काठमाडौं । प्रधानमन्त्री केपी शर्मा ओलीले संविधान कार्यान्वयनका सन्दर्भमा कोही पक्ष र कोही प्रतिपक्ष हुन नसक्ने बताएका छन् ।
संविधान तथा राष्ट्रिय दिवसको अवसरमा सैनिक मञ्च टुँडिखेलमा आयोजित मूल समारोहलाई सम्बोधन गर्दै प्रधानमन्त्री ओलीले संविधान कार्यान्वयनका क्रममा कुनै अप्ठ्यारो आइलागे आवश्यकताअनुसार परिमार्जन गर्न सकिने धारणा राखे ।
नेपालको लोकतन्त्र फराकिलो रहेको भन्दै प्रधानमन्त्रीले कतिपय अतिवादी सोच र संस्थालाई पनि यसले यसै अवधिमा मूल धारमा फर्काउन सफल भएको बताए । ‘जो अझै बाटो भुलिरहेका छन्’, उनले भने, ‘उनीहरुलाई पनि मूल धारमा आउन ढिला नगर्न मेरो आग्रह छ ।’
यसैगरी अर्को प्रसंगमा प्रधानमन्त्री ओलीले आफूले मुर्छित सपनामा पानी छर्किएको बताए । कतिपय सपना साकार पार्नकै लागि आफूले पानी छर्किएको उनको भनाइ थियो ।
‘भन्नकै लागि त भन्न सकिन्छ नि खै त रेल ? खै त पानीजहाज ? कहाँ छ सुरुङ खनेको ? कता छ सतह जलमार्गमा मालवाहक सवारी कुदेको ?’, उनले भने, ‘अझै जोड दिएर सोध्न सकिन्छ, हामीलाई सपना किन देखाएको ? हामीमा आशा किन जगाएको ? म बिनम्रताका साथ स्वीकार्छु, हो, मैले मुर्छित सपनामाथि पानी छम्केकै हुँ । मैले भनेको हुँ निदाएको बेलामा देख्ने सपना हैन, ब्युँझिएको बेलाको सपना देखौँ ।’
यसैगरी प्रधानमन्त्री ओलीले सामाजिक सञ्जालमै समय बिताउने युवाबारे आफूलाई चिन्ता भएको बताएका छन् । ‘युवा पंक्ति छिप्पिनुअघि विकासको तीव्र गतिको दौड पूरा गर्नुपर्छ’, उनले भने, ‘मलाई गर्व ती युवा पंक्तिप्रति छ, जसले विभिन्न इनोभेटिभ प्रयास थालेका छन् । कतिले वस्तु उत्पादनबाट, कतिले सेवा सिर्जना गरेर समाजलाई गुन लगाइरहेका छन् ।’
राष्ट्रपति विद्यादेवी भण्डारीको उपस्थितिमा आयोजित समारोहमा नेपाली सेना, नेपाल प्रहरी, सशस्त्र प्रहरीलगायत निकायबाट सातै प्रदेशका सांस्कृतिक झाँकी, गीत र नृत्य प्रस्तुत गरिएको थियो । संविधान दिवसलाई उत्सवका रुपमा मनाउने क्रममा सेनाको हेलिकोप्टरबाट पुष्पवृष्टि गरिएको थियो ।
प्रकाशित मिति: शुक्रबार, असोज ३, २०७६ १६:४०