इतिहासमैं प्रथम पटक जनप्रतिनिधि सम्मिलित संविधानसभा नेपालको संविधान जारी भएको आज चार वर्ष पुरा भएको छ । संविधान दिवस मूल समारोह समितिले आज बिहान सैनिक मञ्च टुँडिखेलमा विशेष समारोह आयोजना गर्दैछ ।
समारोहमा राष्ट्रपति, उपराष्ट्रपति, प्रधानमन्त्री, सभामुख, राष्ट्रियसभाका अध्यक्ष, संवैधानिक निकायका प्रमुख, मन्त्रिहरु, विभिन्न राजनीतिक दलका नेता, सुरक्षा निकायका प्रमुख, राष्ट्रसेवक कर्मचारीलगायतको उपस्थिति रहने सञ्चार तथा सूचना प्रविधि मन्त्रालयले जनाएको छ ।
त्यस्तै सरकारले संविधान दिवस धुमधामसँग मनाउन आमनागरिकलाई आह्वान गरेको छ । आज घरघरमा राष्ट्रिय झण्डा फहराउन पनि सरकारले आग्रह गरेको छ ।
आज प्रदेश, जिल्ला र स्थानीय तहमा आयोजना हुने समारोहस्थलमा सबै सहभागी हुन निर्देश गरेको छ । संविधान दिवस मूल समारोह समितिको निर्णयअनुसार सबै मन्त्रालय र केन्द्रीय कार्यालयले मातहतका निकायहरूलाई यससम्बन्धी सर्कुलर जारी गरिसकेका छन् ।
सबै मन्त्रालय र केन्द्रीय निकायले आ–आफूसँग सरोकार राख्नेनिजी क्षेत्रका उद्योग व्यवसाय, सामुदायिक तथा निजी विद्यालय, स्वास्थ्य संस्था र गैरसरकारी संघसंस्था र तिनका कर्मचारीलाई संविधान दिवसका कार्यक्रममा औपचारिक पोसाक र राष्ट्रिय झन्डासहित सहभागी हुन भनेका छन् ।
संविधान दिवसलाई राष्ट्रिय दिवसका रुपमा मनाउन तथा दिवसको उल्लास नागरिकस्तरमा पुर्याउन राष्ट्रिय झण्डाको उपयोगलाई प्रवर्द्धन गरिने भएको छ ।
दिवसको अवसरमा सबै मातहत कार्यालयमा असोज २, ३ र ४ गते तीन दिन बेलुका दीपावली गर्न सबैलाई आग्रह गरिएको छ ।
प्रकाशित मिति: शुक्रबार, असोज ३, २०७६ ११:४५
