काठमाडौं । आज बिहीबार बस्ने भनिएकाे नेपाल कम्युनिस्ट पार्टी (नेकपा) को सचिवालय बैठक भाेलिसम्मका लागि स्थगित गरिएको छ ।
प्रधानमन्त्री केपी ओलीको व्यस्तताका कारण सचिवालय बैठक स्थगित गरिएको नेकपाले जनाएको छ ।
आजको बैठकमा नेकपाको प्रदेश २ को कमिटीमा जारी विवादबारे छलफल गर्ने बताइएको थियो । पार्टीको लेखा आयोग, अनुशासन आयोग, प्रवास कमिटी लगायत विभिन्न भ्रातृ संगठनहरुको इन्चार्ज तोक्ने विषयमा पनि छलफल हुने तय भएकाे थियाे ।
प्रदेश २ मा जिल्ला कमिटी चयन गर्दा एकलौटी गरेको भन्दै नेकपामा विवाद चुलिएको छ । तत्कालीन नेकपा एमाले र माओवादी केन्द्रको जिल्ला कमिटी एकीकरण प्रक्रियासँगै गठित जिल्ला कमिटीमा मनपरी भएको भन्दै नेता तथा कार्यकर्ताले केन्द्रमा लिखित असन्तुष्टि दर्ता गराएका छन् ।
प्रकाशित मिति: बिहीबार, असोज २, २०७६ १६:०३
