काठमाडौं । प्रधानमन्त्री केपी शर्मा ओलीले देशमा राजनीतिक उपलब्धि हासिल भइसकेकाले अब विकासको गतिलाई तीव्र ढंगले अघि बढाउनुपर्ने बताएका छन् । छ ।
सातौं विज्ञान दिवसको अवसरमा शिक्षा, विज्ञान तथा प्रविधि मन्त्रालयले राष्ट्रिय सभा गृहमा आयोजना गरेकोे कार्यक्रममा सम्बोधन गर्दै प्रधानमन्त्री ओलीले सरकारले जनताको विकासका चाहनालाई अघि बढाउन सबै प्रयास केन्द्रित गराउने बताएका हुन् ।
‘सरकारबाट जनताले विकासका धेरै अपेक्षा राखेका छन् । यसमा हामी गम्भीर छौं’, प्रधानमन्त्री ओलीले भने, ‘तीव्र गतिमा काम गर्नका लागि विकासलाई प्रविधिसँग जोड्नु आवश्यक छ ।’
प्रधानमन्त्री ओलीले समय बदलिएको नभई आफूहरुले समयलाई बदलेको बताए । लोकतान्त्रिक व्यवस्थामार्फत नै देशलाई अघि बढाउनुपर्ने प्रधानमन्त्री ओलीको धारणा छ ।
‘नेपाली जनताले दुःख पाउनुपर्ने कुनै कारण छैन’, प्रधानमन्त्री ओलीले भने, ‘मुख्य गरी तीन कारणले नेपालीहरुले दुःख पाउनु हुँदैन । पहिलो हामी विद्वान र वीर पुर्खाका सन्तान हौं । दोस्रो हामी प्राकृतिक स्रोत र साधनले भरिपूर्ण ठाउँमा छौं र तेस्रो हामीसँग युवा र क्रियाशील जनसंख्याको बाहुल्य छ । यी सबै चीजको उपयोग हुने हो भने सबै नेपाली समृद्ध र सुखी हुने छन् ।’
प्रधानमन्त्री ओलीले विज्ञान र दर्शनलाई जीवनसँग जोड्नुपर्ने पनि बताए । ‘हाम्रा लागि अहिले धेरै अवसर छन् । किनकि हामीलाई आवश्यक पर्ने धेरै प्रविधि अरुले नै पत्ता लगाइदिएका छन्’, प्रधानमन्त्री ओलीले भने, ‘हामीले प्रविधिको सकारात्मक प्रयोग गरेर समाजलाई अगाडि बढाउनुपर्छ ।’
प्रकाशित मिति: बुधबार, असोज १, २०७६ १८:०६
