काठमाडौं । नेपाली कांग्रेसका सभापति शेरबहादुर देउवाले नेपालमा महिलामैत्री संविधान निर्माण भएको र मुलुकको समृद्धिका लागि महिला पुरुषको समानता अनिवार्य रहेको बताएका छन् । बुधबार पद्मकन्या क्याम्पसको ६९औं वार्षिकोत्सवको उद्घाटन गर्दै सभापति देउवाले यस्ताे बताएका हुन् ।
उनले मुलुकमा लोकतन्त्र र गणतन्त्र समाप्त पार्ने षड्यन्त्र भइरहेको आरोपसमेत लगाएका छन् । लामो संघर्षपछि प्राप्त उपलब्धिको संरक्षण गर्न सबै राजनीतिक दल एक हुनुपर्नेमा जोड दिँदै उनले लोकतन्त्रको सुदृढीकरण गर्दै जनचाहना अनुसारको काम गर्ने प्रतिबद्धता राजनीतिक दलले गर्नुपर्ने बताए ।
देउवाले सरकारका कारण मुलुकमा अराजकता र भ्रष्टाचार मौलाउँदै गएको आरोपसमेत लगाए । मानव अधिकारको संरक्षण र प्रेस स्वतन्त्रताक लागि कांग्रेस प्रतिबद्ध रहेको उनको भनाइ थियो ।
क्याम्पस प्रमुख धनप्रसाद पण्डितले शिक्षाको क्षेत्रमा पद्यकन्या क्याम्पसले महत्वपूर्ण भूमिका निर्वाह गरेको बताए । कार्यक्रममा उत्कृष्ट शिक्षक र कर्मचारीलाई सम्मानित गरिएको थियो ।
प्रकाशित मिति: बुधबार, असोज १, २०७६ १७:१७
