प्रधानमन्त्री केपी शर्मा ओली सिंगापुरबाट स्वास्थ्य उपचार गरी आजै स्वदेश फर्किएका छन् ।स्वास्थ्य उपचारका क्रममा प्रधानमन्त्री सिंगापुर रहँदा देशभित्र विभिन्न टीकाटिप्पणी सार्वजनिक भएका छन । मूलतः आमजनताले प्रधानमन्त्रीको उपचार भइरहँदा स्वास्थ्य अवस्थाको बारेमा स्पष्ट जानकारी नभएकामा असन्तुष्टि जाहेर गरेका थिए ।
स्वभाविक छ, मुलुकको प्रधानमन्त्रीको उपचारका क्रममा स्वास्थ्य अवस्थाका बारेमा जानकारी लिने अधिकार सबै नेपालीलाई छ । तर मुलुकको प्रधानमन्त्री उपचारका क्रममा रहेका बेला संसदमा नेपाली कांग्रेसका नेता गगन थापाले प्रधानमन्त्रीको स्वास्थ्य अवस्थाका सन्दर्भमा अभिव्यक्त गरेको टिप्पणीका सन्दर्भमा भने सत्तारुढ दलका नेताहरुले आपत्ति जनाएका छन् । सत्तारुढ नेकपाकी नेतृ एवं सांसद् जुलीकुमारी महतोले सामान्य मानवीयताको समेत खयाल नगरेर गगन थापाले राजनीति गर्न खोजेको आरोप लगाएकी छिन् ।
रोग पाको या युवा कुनै पनि व्यक्तिको शरीरमा लाग्ने सामान्य प्रक्रियाको समेत ख्याल नगरी सस्तो लोकप्रियता कमाउन चर्को स्वरमा प्रधानमन्त्रीको स्वास्थ्यबारे गलत टिप्पणी गरेको महतोको आरोप छ । प्रधानमन्त्री ओलीको मिर्गौला प्रत्यारोपण गरिएको र सोबारे सारा नेपालीलाई जानकारी हुँदाहुँदै अचानक कुनै समस्या भएको जस्तो गरी गगन थापा प्रधानमन्त्रीको स्वास्थ्य अवस्थामा पनि राजनीति गर्न तम्सिएको महतोले आरोप लगाइन् ।
मिर्गौला प्रत्यारोपण गरिएकै शरीरले लिएर प्रधानमन्त्री ओलीले जनतासँग मत मागेको र जनताले उनको इच्छाशक्ति र देशप्रतिको स्वाभिमानी अडानको बदलामा उनलाई पुनः बहुमत दिएर नेतृत्व गर्न आग्रह गरेको कुरा नबिर्सन महतोले थापालाई सुझाव दिएकी छिन् ।
उपचारमा जानुपूर्व प्रधानमन्त्री प्रत्येक दिन १८ घण्टाभन्दा बढी देशका लागि खटेको नबिर्सन सांसद महतोले गगन थापालाई सुझाव दिएकी हुन् । महतोले प्रश्न गरिन्, ‘भोलि गगन थापा समेत कुनै पनि बेला बिरामी हुन सक्नुहुन्छ । त्यस्तो अवस्थामा गगनजीलाई उपचार गरेर ठिक हुन शुभकामना दिने कि उहाँलाई राजनीतिबाट बिदा लिन सुझाव दिने ?’
प्रधानमन्त्रीको स्वास्थ्यबारे अनर्गल कुरा गरेर अमानवीयता प्रकट गर्नु त छँदै छ त्यसभन्दा पनि अघि बढेर नेकपाको आन्तरिक मामलामा खेल्न खोजेको समेत महतोको आरोप छ । प्रधामन्त्री ठिक भएर आइसकेको र आगामी दिनमा कुनै युवाको भन्दा देशका लागि बढी समय दिने अपेक्षा गर्दै सांसद् महतोले मानवीय स्वास्थ्य जस्तो कुरामा समेत जथाभावी नबोल्न थापालाई आग्रह गरिन् ।
केपी ओली कुनै २÷४ दिनको चटकबाट यो स्थानमा नपुगेको स्मरण गर्दै सासंद् महतोले भनिन्, ‘साथीहरुले केपी ओलीले जनताको मुक्तिका लागि दशकौँ कालकोठरी भोगेको र जनताको मर्यादाका लागि स्वाभिमानको आन्दोलन गरेको बिर्सिए जस्तो छ ।’
महतोले भनिन्, ‘को प्रधानमन्त्री बन्ने या कसले नेतृत्व गर्ने भन्ने नेकपाको आन्तरिक मामिला भएकाले यसमा जान्ने बनेर फुरफुर नगर्न थापालाई आग्रह गर्दछु ।’ आफ्नो पार्टीको चिन्ता लिन र मानवीय विषयमा समेत राजनीति नगर्न सांसद् महतोको आग्रह छ ।
प्रकाशित मिति: शुक्रबार, भदौ २०, २०७६ १८:२७
