काठमाडौं । नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले केही समययता प्रतिगमन र प्रतिगामीहरुले टाउको उठाउन खोजेकाे बताएका छन् ।
बिहीबार राजधानीमा दलित अधिकारका लागि जनप्रतिनिधिहरुको भूमिका विषयक कार्यक्रममा बोल्दै उनले प्रतिगामीहरुले टाउको उठाउन खोजेकाले राजनीतिक परिवर्तनका पक्षधरहरु एकजुट र सचेत हुनुपर्नेमा जाेड दिए ।
लामो संघर्ष र प्रयासबाट आएको राजनीतिक परिवर्तनमाथि प्रश्न उठाउन चलखेल भइरहेको आरोप प्रचण्डले लगाएका छन् ।
उनले भने, ‘प्रतिगमन र प्रतिगामीहरुले टाउको उठाउन खोज्दै छन् । राजनीतिक परिवर्तनका सहयात्री र प्राप्त उपलब्धिलाई जोगाउनका लागि नेपाली जनताको चाहना अनुसार अघि बढ्नु पर्ने आवश्यकता छ ।’
‘छिटो भन्दा छिटो काम गरेर जनतालाई समृद्धि, विकास र यो संविधानले नयाँ युग तिर लैजाँदैछ भन्ने विश्वास दिलाउनुको विकल्प छैन । यो परिवर्तन एक्लै कसैले ल्याएको होइन’, उनले भने, सबैले यसलाई जोगाउन साझा जिम्मेवारी हो। पुरानौ शैली माथि प्रहार नगरे प्रतिगामीहरुले भित्रै शक्ति सञ्चय गर्छ’ ।
केही तत्वहरुले अन्यौल र भ्रम पार्न खोज्दैमा अहिले नै खतरा आयो भन्ने पक्षमा आफू नरहेकाे पनि उनले बताए ।
प्रकाशित मिति: बिहीबार, भदौ १९, २०७६ १६:२३