काठमाडौं: पछिल्लो समय सत्तारुढ नेपाल कम्युनिष्ट पार्टी (नेकपा)काे नेतृत्वभित्र तनावको अवस्था देखिएको छ । पार्टी एकताका काम अघि बढिरहेको बेला नेतृत्वबीच भनाभनकाे स्थिति भएकाे हाे ।
पार्टी अध्यक्ष केपी शर्मा ओली उपचारका लागि सिङ्गापुर जानुअघि ओली र माधव नेपालबीच देखिएको चर्काचर्कीका कारण पार्टीमा असहजता पैदा भएको छ । यहि असहजताको अवस्थामा हटाउन नेकपाका अर्का अध्यक्ष पुष्पकमल दाहाल ‘प्रचण्ड’ ले आफ्नै निवास खुमलटारमा बोलाएर नेता नेपालसँग शुक्रबार छलफल गरेका छन् ।
बिहीबार भएको बैठकमा अध्यक्ष केपी शर्मा ओली र नेता नेपालबीच सचिवालयमा तीन नेता थप्नु पर्ने, वरियताका विषयमा पुनर्विचार गरिनु पर्नेलगायतका विषयमा चर्काचर्की भएको थियो । बिहीबार नै अध्यक्ष ओली उपचारका लागि सिङ्गापुर प्रस्थान गरिसकेका छन् ।
अध्यक्ष ओली सिङ्गापुर प्रस्थान गरेको भोलिपल्टै दुई नेताबीच भएकाे भेटवार्तालाई चासोका साथ हेरिएको छ ।
अध्यक्ष प्रचण्ड र नेता नेपालबीच के कस्ता विषयमा छलफल भए भन्ने कुरा भने बाहिर आएको छैन ।
प्रकाशित मिति: शुक्रबार, भदौ ६, २०७६ २३:१४