काठमाडौं: राष्ट्रिय जनता पार्टीका सांसद राजेन्द्र महतोले सरकारले आफूविरुद्ध भ्रम छर्ने काम गरेको आरोप लगाएका छन् । प्रतिनिधिसभाको सोमबारको बैठकमा विशेष समय लिएर बोल्दै उनले राष्ट्रियतासँग जोडिएको संवेदनशील विषयमा सरकारले कुन नियत राखेको हो भन्दै प्रश्न उठाए। भ्रमको खेती गरेर सरकारले के गर्न खोजेको हो? , उनले भने, सरकारको नियतमाथि नै प्रश्न उठेको छ।
सरकारका प्रवक्ताले राजेन्द्र महतो लगायत आठ जनाको नागरिकता बदर गरिएको भनेर जानकारी गराएको र सोही अनुसार सञ्चारमाध्यमले पनि समाचार सम्प्रेषण गर्ने काम गरेको भन्दै उनले राज्यले कसैको चरित्र हत्या गर्ने काम गर्न नमिल्ने तर्क गरे ।
गत साउन १६ गते बसेको मन्त्रिपरिषद्को निर्णय सुनाउन आयोजित आइतरबारको पत्रकार सम्मेलनमा सरकार प्रवक्ता गोकुलप्रसाद बाँस्कोटाले विभिन्न आठ जना भारतीयले लिएको नेपाली नागरिकता खारेज गरेको बताएका थिए। त्यसमा राजेन्द्र महतो नाम पनि परेको थियो। तर कतिपय सञ्चार माध्यममा राजपा नेता महतोलाई जोडेर समाचार प्रशारित गरेका थिए।
‘भ्रमको खेती शुरु भएको सम्बन्धमा म देशबासीलाई जानकारी गराउन चाहन्छु । हिजो मात्रै नेपाल सरकारका प्रवक्ताले राजेन्द्र महतो लगायत आठ जनाको नेपाली नागरिकको प्रमाणपत्र बदर गरिएको छ भनेर समाचार आएको छ । कुन राजेन्द्र महतो हो ? खै त ?
राष्ट्रियतासँग जोडिएको यस्तो संवेदनशील विषयमा नेपाल सरकारका प्रवक्ताले नेपाल सरकारको निर्णय सार्वजनिक गर्दा राजेन्द्र महतोलगायत यति जनाको नागरिकता वदर गरिएको भनेर समाचार आउनु के हो त्यो ?’ महतोले प्रश्न गरे ।
उनले भने, ‘कुन नियतले हो ? यो सरकार चौतर्फी रुपमा असफल त भइरहेकै हो । यो भ्रमको खेती गरेर के गर्न खोजेको हो सरकारले ? राजेन्द्र महतोको राष्ट्रियता माथिको प्रश्न उठाउँदै भ्रम छर्ने काम यो के गरेको ? सरकारको नियतमाथि नै प्रश्न उठेको छ । सरकारले यसरी भ्रम फैलाउने काम गर्नुहुन्न् । मान हानी गर्न पाइँदैन । सरकारले माफी माग्नुपर्छ ।’ उनले यो विषयमा सञ्चार माध्यम पनि गैरजिम्मेवार भएको बताए।
प्रकाशित मिति: सोमबार, साउन २०, २०७६ २१:०२
