बसिदिनुस् मान्य सदस्यहरू । बसिदिनुभयो भने म नयाँ कुरा सुनाउँछु । नयाँ कुरा सुनाउन त बस्दिनुपर्यो, भनेर सभामुखले भनिरहँदा प्रतिपक्षीहरू मुस्कुराउँदै उभिइरहेका थिए ।
प्रमुख प्रतिपक्षी नेपाली कांग्रेस र राजपाका सांसदहरुको विरोधका बावजुद ४ विधेयकबारे सन्देश संसद्मा प्रस्तुत भएका छन्। पटक-पटक आग्रह गर्दा पनि प्रतिपक्षी सांसदहरू नबसेपछि सभामुख महराले विनियोजन विधेयक २०७६, आर्थिक विधेयक २०७६, राष्ट्र ऋण उठाउने विधेयक २०७६ र ऋण तथा जमानत २३औं संशोधन विधेयक २०७६ का सम्बन्धमा राष्ट्रिय सभाबाट सन्देशसहित प्राप्त प्रस्तावबारे जानकारी प्रतिनिधि सभाका सचिव गोपाल नाथ योगीलाई गराउन समय दिएका थिए ।
सचिव योगीले सन्देश पढेर सुनाएलगत्तै प्रतिनिधिसभा बैठक यही असार ३० गतेसम्मका लागि स्थगित भएको छ ।
सर्लाहीमा प्रहरीको गोलीबाट प्रदर्शनकारीको मृत्यु भएको तथा विप्लव नेतृत्वको नेकपाका जिल्ला इञ्चार्ज कुमार पौडेलको मृत्युको विषयमा संसदीय छानबिन समिति गठनको माग गर्दै प्रतिपक्षी दलहरूले यसअघिको बैठक पनि अवरुद्ध पारेका थिए ।