काठमाडौं : उद्योग वाणिज्य तथा आपूर्तिमन्त्री मात्रिका यादवले भारतबाट आयातित तरकारीको परीक्षणमा सचिवले डुबाएको प्रतिक्रिया दिएका छन् । भारतबाट नेपाल भित्रिएका तरकारी परीक्षण गर्ने निर्णयबाट सरकार पछि हटेको आरोप खेपिरहेका बेला सोमबार मन्त्रालयमा पत्रकार सम्मेलन गरेर उनले सचिवको भर पर्दा निर्णय कार्यान्वयनमा बाधा पुगेको बताए ।
“वाणिज्य तथा आपूर्ति सचिवले क्याबिनेट मिटिङमा प्रस्ताव लैजानुभएको हो । क्याबिनेटमा लगेको प्रस्ताव क्याबिनेट समितिमा गएर निर्णय तहमा पुगेको देखिन्छ । तर, परीक्षण गर्ने सामग्री नहुँदा निर्णय कार्यान्वयन हुन सकेन, यसको सम्पूर्ण जिम्मेवारी म लिन्छु,” मन्त्री यादवले पत्रकार सम्मेलनमा भने ।
उनले सीमा नाकामा परीक्षण गर्ने क्षमता नहुँदा पनि मन्त्रिपरिषदमा प्रस्ताव लगेको भन्दै सचिवको आलोचना गरे ।
“विश्वास गरेर सचिवको भर परिएको हुन्छ । तर, सचिवहरूले गुमराहमा राखे,” उनको आरोप थियो ।
उनले आयातित तरकारीमा विषादी भए–नभएको जाँच गर्ने कुरामा सरकारको निर्णय यथावत् रहेको र परीक्षणशाला निर्माण भएपछि सरकारको निर्णय कार्यान्वयन गरिने बताए । परीक्षणशाला तयार नहुँदासम्म पूर्ववत् रुपमा तरकारी भित्रन दिइने मन्त्रीले स्पष्ट पारे ।
पत्रकार सम्मेलनमा मन्त्रीले ‘गम्भीर कमजोरी’ भएको भन्दै माफी पनि मागे । “सचिवको भर परेर गल्ती मैले गरेँ । क्षमता नहुँदा नहुँदै पनि प्रस्ताव गयो । निर्णय कार्यान्वयन भएन, यसको के सजाय दिनुहुन्छ ?” मन्त्रीले निरिह हुँदै गुनासो गरे ।
पत्रकार सम्मेलनमा उद्योग मन्त्रालयकी सचिव यमकुमारी खतिवडाले प्रस्तावप्रति सचिव जवाफदेही हुनुपर्ने बताइन् । “मन्त्रीको सल्लाहकार सचिव नै हो । प्रस्ताव तयार पार्दा पक्कै मन्त्रीसँग कुरा भएकै होला । निर्णय कार्यान्वयनमा समस्या देखिएपछि त्यसको जिम्मेवारी लिनुपर्छ,” उनले भनिन् ।
उद्योग सचिव भएकाले प्रस्ताव तयार पार्दा आफ्नो संलग्नता नरहेको उनको भनाइ थियो ।
मन्त्री यादवले यथाशीघ्र क्षमता निर्माण गरेर विषादीरहित तरकारीजन्य वस्तु आयातमा जोड दिइने र सरकार पछि हट्यो, प्रधानमन्त्रीको ठाडो निर्देशनमा रोकियो जस्ता विश्लेषण नगर्न सञ्चारमाध्यमलाई आग्रह गरे ।
प्रकाशित मिति: सोमबार, असार २३, २०७६ २०:०९