काठमाडौं : प्रधानमन्त्रीका प्रमुख सल्लाहकार विष्णु रिमालको ट्वीट छौडाहर ले संसदमा प्रवेश गरेको छ । प्रमुख प्रतिपक्षी दल नेपाली कांग्रेसका सांसदले उक्त्त शब्दबारे प्रतिनिधिसभामा प्रश्न उठाएका छन्।
प्रतिनिधिसभाको आइतबारको बैठकको शून्य समयमा बोल्दै नेपाली कांग्रेसका सांसद अतहर कमाल मुसलमानले नाम उल्लेख नगरीकनै ट्वीटमा उल्लेखित ‘छौडाहरू’ को, कसरी सञ्चालित छन्? भनी प्रश्न गरे।
प्रधानमन्त्रीका प्रमुख सल्लाहकार रिमालको ट्वीटबारे सर्वत्र चर्चा भइरहेका बेला सांसद मुसलमानले सरकारलाई नै ‘छौडाहरू’ का बारेमा प्रश्न गरेका हुन्।
उनले भने, ‘यो मेरो भनाइ होइन। कसैको ट्वीटको भनाइ हो। विदेशी वा स्वदेशीले देशमा हाल छौडाहरू छोडिरहेका छन्। त्यही छौडाहरू देशमा चलायमान हुँदा राष्ट्रवादको मास्क लगाएको सरकारले देशमा विदेशी प्रभुको इसारामा आइफा गर्न लागेको अवस्था देखिन्छ। त्यही छौडाहरू अझै सक्रिय हुँदा विभिन्न देशबाट आयात भइरहेका विषादीयुक्त तरकारी र खाद्यान्नहरू बिनापरीक्षण नेपाल भित्रिइरहेका छन् र नेपाली जनताले विषादीयुक्त तरकारी खान बाध्य भएका छन्। यसरी जनताको स्वास्थ्यसँग खेलवाड गर्ने, धर्म संस्कृतिमा प्रहार गर्ने, विदेशीको इसारामा राष्ट्रवादको नयाँ बहस सुरू गर्ने ती छौडाहरू कहाँ कसरी चलायमान छन्? र ती छौडाको कसबाट सञ्चालनमा छन्?’
शून्य समयमा बोल्दै सांसद गगन थापाले आफूलाई राष्ट्रवादी बताउने सरकारले विदेशीको दबाबमा भारतबाट आयातित तरकारी र फलफूलमा विषादी परीक्षण नगर्ने निर्णय गरेको भन्दै ‘तपाईंको राष्ट्रवादी खुट्टादेखि सकिएकै हो। घुँडामा भ्वाङ कत्रो परेको छ बताइदिनुहुन्छ कि ?’ भनी प्रधानमन्त्रीलाई प्रश्न गरे।
प्रकाशित मिति: आइतबार, असार २२, २०७६ २१:२२