काठमाडौं : गृहमन्त्री राम बहादुर थापाले प्रहरीलाई ढुङ्गा हान्नु शान्तिपूर्ण आन्दोलन नभएको बताएका छन् ।
गृहमन्त्री थापाले आज संसदमा सासंदहरुका प्रश्नहरुको उत्तर दिँदै आइतबार माइतीघरमा गुठी विधेयकविरुद्ध प्रदर्शन शान्तिपूर्ण नभएको बताएका हुन् । प्रदर्शनकारीहरुले ढुङ्गा हानेर प्रहरीको मुखै फोड्ने काम शान्तिपूर्ण आन्दोलन हुन नसक्ने उनले बताए ।
थापाले भने ‘सार्वजनिक आवागमनलाई अवरोध गरे । सडकमै सुत्ने र सार्वजनिक अवागमन अवरुद्ध पारे, उनले भने – कानून अनुसार यो गर्न पाइँदैन । शान्ति शुव्यवस्था कायम राख्ने पनि कानुनले नै भन्छ ।’
थापाले गुठी विधेयकविरुद्ध प्रदर्शन गर्नेहरुमाथि पानीको फोहरा हान्दासमेत भीड नियन्त्रणमा नआएपछि प्रहरीले गरेको बल प्रयोग गरेको स्पष्टीकरण दिएका छन् ।
प्रदर्शनकारीले सडकै सुतेर बाटो अवरोध गरेको र प्रहरीले पटक पटक माइकिङ गर्दा समेत अटेर गरेपछि सामान्य बल प्रयोग गरेको बताए । कानून विपरीत सडक अवरोध गर्ने र प्रहरीमाथि नै ढुङ्गा प्रहार गर्दा केही प्रहरी घाइते भए’ गृहमन्त्री थापाले अगाडि भने, ‘त्यसपछि सवारी साधानको घर र सर्वसाधारणको ज्यानको क्षती हुन नदिन प्रहरीले पानीको फोहोरा प्रहार गर्दा समेत भिड नियन्त्रमा नआएकोले सामान्य बल प्रयोग गरी चार जना प्रदर्शनकारीलाई नियन्त्रणमा लिइएको थियो ।
गुठीसम्बन्धी कानून संशोधन गर्न बनेको विधेयकको विरोधमा आइतबार माइतीघरमा प्रदर्शन भएको थियो । प्रहरीले प्रदर्शनकारीमाथि पानीको फोहरा हान्नुका साथै धरपकड गरेको थियो । झडपमा केही प्रदर्शनकारी घाइते भएका थिए ।
प्रकाशित मिति: मंगलबार, जेठ २८, २०७६ १६:१३
