काठमाडाैं : बिहीबार बिहान ९ बजेबाट सारेर ११ बजे बस्ने भनिएकाे सत्तारुढ दल नेकपाकाे सचिवालय बैठक अनिश्चितकालका लागि स्थगित भएकाे छ ।
प्रधानमन्त्री तथा पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्ड’ले बैठकका लागि गृहकार्य नपुगेकाे भन्दै स्थगन गरेको पार्टीका प्रवक्ता नारायणकाजी श्रेष्ठले जानकारी दिए ।
बैठकका लागि बिहान ११ बजे प्रधानमन्त्री निवास बालुवाटारमा नेकपाका शीर्ष नेता पुगे पनि एकछिन बसेर बैठक स्थगन गरिएकाे हाे ।
दुवै अध्यक्षद्वयले केन्द्रीय सदस्यको कार्यविभाजन तथा जिल्ला कमिटीका इञ्चार्ज र सहइञ्चार्ज तोक्नेबारे अझै गृहकार्य पुगेन भन्नुभयो’, उनले भने, त्यसैले आज सबै सचिवालयका सदस्य जम्मा भए पनि एकछिन बसेर बैठक स्थगन गरियो ।’
उनका अनुसार अब सचिवालयकाे अर्काे बैठक प्रधानमन्त्री ओली युरोप भ्रमण सकेर आएपछि मात्रै बस्ने छ । प्रधानमन्त्री शनिबार साताव्यापी युराेप भ्रमणमा जाने कार्यक्रम छ ।
आज केन्द्रीय सदस्यको कार्यविभाजन तथा जिल्ला कमिटीको इञ्चार्ज र सहइञ्चार्ज टुङ्गो लगाउने भनिएकाे थियाे ।
केन्द्रीय सदस्यको कार्यविभाजन र जिल्ला इञ्चार्ज तथा सहइञ्चार्ज तोक्ने विषयमा मङ्गलबारदेखि नियमित बैठक बस्दै आएको थियो । कार्यविभाजन सकेपछि बाँकी रहेका साङ्गठानिक एकीकरणका अन्य काम र थप कार्यविभाजनका विषयमा समेत प्रवेश गर्ने पार्टीको तयारी थियो ।
प्रकाशित मिति: बिहीबार, जेठ २३, २०७६ १७:४४
