काठमाडाैं : प्रमुख प्रतिपक्ष दलका सांसद डा मीनेन्द्र रिजालले बजेट त्रुटिपूर्ण भएको बताएका छन् ।
गत जेठ १५ गते बुधबार अर्थमन्त्री डा युवराज खतिवडाले संघीय संसद्को संयुक्त बैठकमा पेस गरकाे आर्थिक वर्ष २०७६/०७७ को बजेट त्रुटिपूर्ण भएको भन्दै उनले सच्याउन माग गरे ।
डा रिजालले आर्थिक वर्ष २०७६/०७७ का लागि पेस भएको बजेट पुस्तिकाको दफा ‘क,’ ‘ख’ ‘ग’ र ‘ङ’ तथा अनुसूची २ मा उल्लेख भएको बजेट त्रुटिपूर्ण भएकाले यसको जवाफका लागि सभामुखमार्फत सरकारको ध्यानाकर्षण गराएका हुन् ।
प्रतिनिधिसभाको आजको बैठकमा सांसद रिजालले सरकारको जवाफ माग गरेपछि सभामुख कृष्णबहादुर महराले सो विषयमा सरकारको ध्यानाकर्षण भएको जानकारी दिए ।
त्यसैगरी सांसद राजकिशोर यादवले सरकारले संविधान मिच्दै गएको, विधि र प्रक्रियालाई अवलम्बन नगरेको आराेप लगाए । उनले केही दिनअघि लोकसेवा आयोगले सार्वजनिक गरेको विज्ञापन संविधानको धारा ३६ को उपधारा २ विपरीत भएको दाबी गरेका थिए ।
प्रकाशित मिति: सोमबार, जेठ २०, २०७६ १९:०१