काठमाडौं : नेत्रविक्रम चन्द नेतृत्वको नेकपाले पार्टीका निलम्बित पोलिट्ब्युरो सदस्य पदम राई सत्तारुढ दल नेकपामा प्रवेश गरेपछि सदस्य समेत नरहने गरी निष्काशन गरेको छ ।
आइतबार राई नेकपा प्रवेश गरेलगत्तै प्रवक्ता खिड्गबहादुर विश्वकर्मा प्रकाण्डले विज्ञप्ति जारी गर्दै उनलाई निष्काशन गरेका हुन् । विज्ञप्तिमा राईमाथि अपराधपूर्ण कार्यमा सहभागी भएको, क्रान्तिको कठिन तर महान् प्रक्रियामा टिक्न नसकेका कचराको संज्ञा दिइएको छ ।
‘रूपान्तरण र उपचारको अथक प्रयास गर्दागर्दै असम्भव भएपछि र पार्टी नीति र कार्यक्रमको विरुद्ध गएपछि गत स्थायी समिति बैठकले निलम्बन गरेका पदम राई झन्झन् पार्टीकाविरुद्ध अन्तर ध्वंश र अपशराधपूर्ण कार्यमा संलग्न भएकाले पार्टी साधारण सदस्यसमेत नरहनेगरी निष्काशन गरिएको छ ,’ प्रकाण्डले जारी गरेको विज्ञप्तिमा उल्लेख छ, ‘क्रान्तिको कठिन तर महान् प्रक्रियामा टिक्न नसकेका कैयौँ कचराहरू पलायन हुने क्रान्तिको अनिवार्य नियम हो र हाम्रो पार्टीका सन्दर्भमा पनि त्यो त्यत्तिकै सत्य हो ।’
नेपालका सर्वहारा वर्ग, श्रमिक तथा उत्पीडित जनसमुदायको अग्रदस्ता आफ्नो पार्टी भएको भन्दै राष्ट्रियता, जनतन्त्र र जनजीविकाका पक्षमा वैज्ञानिक समाजवादी क्रान्ति निरन्तर अगाडि बढिरहेको प्रकाण्डले भनेका छन् । ‘ यो भीषण र पेचिलो सङ्घर्ष पुँजीपतिवर्ग र सर्वहारा वर्गकाबीचको दुई विश्वदृष्टिकोणको लडाइँ पनि हो । यो लडाइँमा सामाजिक दलाल फासिवादी वली–प्रचण्ड मण्डलीको सरकारले दमनका सबै हर्कत जारी राखेको छ । तरयो दलाल पुँजीपतिवर्गको प्रतिनिधि सरकार जनताबाट अलग–थलग बन्दै गएको छ ,’ विज्ञप्तिमा उल्लेख छ ।
प्रकाशित मिति: आइतबार, जेठ १९, २०७६ १७:११