काठमाडौं : भारत भ्रमणमा गएका प्रधानमन्त्री केपी शर्मा ओली आज स्वदेश फिर्ता भएका छन् ।
भारतमा दोस्रो कार्यकालका लागि प्रधानमन्त्री बनेका नरेन्द्र मोदीको शपथग्रहण समारोहमा सहभागी हुन भारत पुगेका ओली आज फर्किएका हुन् ।
ओलीलाई स्वागत गर्न सभामुख कृष्णबहादुर महरा, उपप्रधान तथा रक्षामन्त्री ईश्वर पोखरेलसहितका व्यक्तित्व एअरपाेर्ट पुगेका थिए।
अन्य समयमा विदेशबाट फर्किएपछि पत्रकारहरूलाई प्रतिक्रिया दिने ओली यसपटक भने नेपाल एयरलाइन्सबाट उत्रिनेबित्तिकै पत्रकारसँग कुरा नै नगरी सुरक्षाकर्मी र सरकारी अधिकारीका साथ बाहिरिए ।
बिहीबार नयाँ दिल्ली गएका ओलीले बिहीबार साँझ मोदीको शपथग्रहण समारोहमा सहभागिता जनाएका थिए । ओली र मोदीबीच शुक्रबार दिउँसो हैदरावाद हाउसमा भेटवार्तासमेत भएको थियो ।
शिष्टाचार भेटवार्तामा दुवै मुलुकका प्रधानमन्त्रीले द्वीपक्षीय सम्बन्धलाई राज्यस्तरमा र जनस्तरमा पनि अझै सुमधुर बनाउने प्रतिबद्धता व्यक्त गरेका थिए ।
प्रकाशित मिति: शुक्रबार, जेठ १७, २०७६ २३:०२