काठमाडौं : नेपालको आफ्नै भूउपग्रह प्रक्षेपण परियोजनाको समझदारीलाई अन्तिम रूप दिन प्रधानमन्त्री केपी शर्मा ओली २६ जेठमा फ्रान्स जाने भएका छन् ।
सन् २०२२ सम्ममा आफ्नै भूउपग्रह राख्नेगरी नेपाल र फ्रान्सबीच प्रक्रिया अघि बढाइएको नेपाल दूरसञ्चार प्राधिकरणका अधिकारीहरूले बताएका छन्।
अधिकारीहरूले उक्त भ्रमणलाई नेपाल र फ्रान्सबीचको कूटनीतिक सम्बन्ध सुरु भएको ७०औं वर्षगाँठको उपलक्ष्यमा गर्न लागिएको उच्चस्तरीय भ्रमण पनि भनेका छन् ।
नेपाल र फ्रान्सबीच सन् १९४७ मा कूटनीतिक सम्बन्ध स्थापना भएको थियो ।
सन् १९८४ मा अन्तर्राष्ट्रिय टेलिकम युनियनले नेपाललाई १२३.३ र ५० डिग्री पूर्वी देशान्तरमा दुईवटा अर्विटल स्लट उपलव्ध गराएको थियो ।
दुईमध्ये एउटा आर्विटल स्लटमा नेपालले आफ्नै भूउपग्रह प्रक्षेपण गर्न करीब २२ अर्ब खर्च लाग्ने अधिकारीहरूले बताएका छन् ।
गत फागुनमा दूरसञ्चार प्राधिकरण र फ्रान्सेली कम्पनी थाल्स अनेमिया स्पेबीच भएको समझदारीपत्रमा लागत स्रोतबारे भने उल्लेख नभएको प्राधिकरणका कार्यवाहक अध्यक्ष पुरुषोत्तम खनालले बताएका छन् ।
समझदारीपत्रमा हस्ताक्षर गर्न सञ्चार तथा सूचना प्रविधि मन्त्री गोकुल बाँस्कोटा, प्राधिकरणका कार्यवाहक अध्यक्ष खनाल लगायत अधिकारी फ्रान्स गएका थिए ।
उक्त कम्पनीमा फ्रान्स सरकारको २६ प्रतिशत शेयर रहेको बताइएको छ । तर उक्त बृहत प्राविधिक परियोजनाबारे केही महीनायता सञ्चार तथा सूचना प्रविधिमन्त्री गोकुल बाँस्कोटाले प्राविधिकसँग छलफल गरेका छैनन् ।
ओली फ्रान्सपछि स्वीट्जरल्याण्ड र बेलायतको भ्रमण गर्ने बालुवाटार स्रोतले बताएको छ । उक्त भ्रमणको क्रममा प्रधानमन्त्री ओलीले १० जूनमा स्वीट्जरल्याण्डको जेनेभामा अन्तर्राष्ट्रिय श्रम संगठन (आइएलओ) स्थापनाको १०० औं वर्षगाँठ सन्दर्भ पारेर आयोजित अन्तर्राष्ट्रिय श्रम सम्मेलनलाई पनि सम्बोधन गर्ने श्रम मन्त्रालयले जनाएको छ ।
प्रकाशित मिति: शुक्रबार, जेठ १७, २०७६ १२:३२
