काठमाडौँ : सत्तारुढ दल नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले प्रधानमन्त्री केपी ओलीले सत्ता हस्तान्तरणका लागि तयार हुनुपर्ने बताएका छ । तत्कालिन नेकपा एमाले र नेकपा माओवादीबिच पार्टी एकता हुँदा नै ओली र दाहालबिच सत्ता साझेदारी हुने सहमति भएको भनिए पनि सो निर्णय सार्वजनिक भने भएको थिएन ।
पत्रकार एक टेलिभिजन अन्तर्वार्ताका क्रममा प्रचण्डले सत्ता र पार्टी सञ्चालन मिलेर गर्ने तथा जिम्मेवारी स्पष्ट हुने गरि आलोपालो गर्ने सहमति भएको खुलासा गरेका हुन् । ‘पार्टी एकताका बेला हामी (म र ओली जी) बिच भएको सहमति लुकेको छैन, त्यो लिखित नै छ । जसमा स्पष्ट रुपमा सत्ता सञ्चालन आलोपालोका आधारमा गर्ने भन्ने उल्लेख छ ,’ उनले भनेका छन् ।
त्यस्तै उनले भनेका छन्, ‘हामी अहिले पार्टीमा दुई अध्यक्ष छौँ र सत्ताको नेतृत्व उहाँ (ओली जी) ले गर्नु भएको छ । सहमति भएको भए पनि म आफूलाई प्रधानमन्त्री बन्नु पर्छ जस्तो या त्यसको लोभ छैन । जनअपेक्षा अनुसार समृद्धि र विकासका काम भए भने सत्ता ओली जी ले नै पाँच वर्षै चलाउँदा पनि मलाई फरक पर्दैन । तर मेरो भूमिका पनि स्पष्ट चाहिँ हुनु पर्छ ।’
प्रचण्डले भूमिका स्पष्ट भन्दै पार्टी या सत्ताको जिम्मेवारी दुई नेताबिच बाँडफाँड हुनु पर्ने बताएका छन् । प्रचण्डले भनेका छन्, ‘ओली जी ले राम्रो काम गर्दै जानु भयो भने त्यसमा मेरो साथ र समर्थन रहन्छ । सम्झौतामा जे लेखिएको भए पनि प्रधानमन्त्री पद चाहियो भन्न नजाने भएपनि आफ्नो भूमिका पनि स्पष्ट हुनुपर्ने भन्दै उनले त्यसबारे पार्टी पंक्तिमा छलफल भइरहेको पनि बताए ।
प्रकाशित मिति: बिहीबार, जेठ १६, २०७६ १७:०९
