काठमाडौँ: राष्ट्रिय जनता पार्टी नेपालले संबिधान संशोधनबारे सरकारको स्पष्ट धारणा माग गरेको छ । प्रतिनिधिसभाको मंगलबार बसेको बैठकमा राजपाका सांसद महेन्द्र राय यादवले संविधान संशोधनबारे स्पष्ट धारणा नआए संसद अवरोध गर्न बाध्य हुने चेतावनी पनि दिए ।
गिरिशचन्द्रलाल नेतृत्वको प्रतिवेदन र नेपालगञ्ज घटनाको प्रतिवेदन सार्वजनिक गर्न सरकारलाई पुन रुलिङ गर्न पनि उनले माग गरे । उनले आफुहरुले उठाएका विषयमा सभामुखले सरकारलाई रुलिङ गरेपनि सरकारले त्यसको सुनुवाई नगरेको भन्दै आक्रोस व्यक्त गरे । उनले संविधान सशोधनका बारेमा सरकारले आफुहरुलाई दिएको आश्वासन पुरा नगरेको भन्दै सरकारको स्पष्ट धारणा आउनुपर्ने बताए । विगतमा संविधान संशोधनको मुद्दालाई लिएर विगतमा सरकारलाई समर्थन दिएपनि सरकारले एक बर्षसम्म आश्वासन मात्रै दिएको भन्दै उनले भने, ‘नेपाली जनताले पहिचान र अधिकारका मागमा सरकारलाई अविलम्ब पुन रुलिङ गरियोस् भन्ने कुरामा ध्यानाकर्षण गराउन चाहान्छु ।’
यावदको मागपछि सभामुख कृष्णबहादुर महराले राजपाले उठाउँदै आएका मागबारे पुन सरकारको ध्यानकर्षण गराएका थिए । मंगलबारको बैठक सुरु हुनेवितिकै राजपाका सांसदहरु उठेर विरोध गरेका थिए । त्यसपछि सभामुख महराले यादवलाई धारणा राख्न अनुमति दिएका थिए ।
प्रकाशित मिति: मंगलबार, जेठ ७, २०७६ १७:४६
