काठमाडौं : डा. सिके राउतकाे नयाँ राजनीतिक दल जनमत पार्टी निर्वाचन आयाेगमा विधिवत रूपमा दर्ता भएकाे छ ।
राउतले गत आइतबार निर्वाचन आयोगमा ३५ केन्द्रीय सदस्य रहेको ‘जनमत पार्टी’ दर्ता गर्न दिएकाे निवेदनउपर आज बसेकाे आयाेगकाे बैठकले राउतकाे पार्टी दर्ता गर्ने निर्णय गरेकाे हाे ।
आयोगको बैठक संख्या ६, मिति २०७६/०२/०६ को निर्णयाले राउत नेतृत्वकाे जनमत पार्टी नयाँ राजनीतिक दलका रुपमा दर्ता गर्ने र सोको सूचना नेपाल राजपत्रमा प्रकाशित गर्ने निर्णय समेत गरेकाे हाे ।
मधेसमा पृथकतावादी आन्दाेलनकाे नेतृत्व गरिरहेका राउतले गत फागुन २४ गते सरकारसँग ११ बुँदे सम्झाैता गरेर आन्दाेलन छाेडेका थिए । सरकारसँग सम्झाैता भएकाे दुई महिनापछि उनी दल दर्ता गर्न निर्वाचन आयाेग गएका हुन् ।
राउतकाे फेसबुक पेजमा सार्वजनिक गरेअनुसार ३५ सदस्यकाे केन्द्रीय समितिकाे अध्यक्ष उनी आफैँ छन् । समितिमा १२ महिला, दलित समुदायबाट ६ जना र मुस्लिम समुदायबाट चार जना छन् ।
प्रकाशित मिति: सोमबार, जेठ ६, २०७६ २२:१८