काठमाडौं : भूमाफियाले कब्जा जमाएको भनिएको बालुवाटारस्थित प्रधानमन्त्री निवासको जग्गामा राष्ट्रिय झण्डा गाड्न पुगेका विवेकशील नेपाली दलका नेता, कार्यकर्तालाई प्रहरीले नियन्त्रणमा लिएको छ ।
बुधबार बिहान विरोधमा प्रधानमन्त्री निवास पछाडि रहेको जग्गामा राष्ट्रिय झण्डा गाड्न पुगेका विवेकशील नेपाली दलका अध्यक्ष उज्वल थापासहित एक दर्जन बढी नेता, कार्यकर्तालाई प्रहरीले नियन्त्रणमा लिएको हो ।
प्रधानमन्त्री निवास, प्रधानन्यायाधीश निवास र सभामुखको निवास पछाडि रहेको सरकारी जग्गा सत्तारुढ नेकपा कम्युनिष्ट पार्टीका महासचिव विष्णु पौडेलले समेत खरिद गरेको पाइएपछि त्यसको विरोधमा विवेकशील नेपाली दलका नेता, कार्यकर्ता र स्थानीय विरोधमा उत्रिएका थिए । उनीहरूले निषेधित क्षेत्र तोड्न खोजेपछि प्रहरीले नियन्त्रणमा लिएको हो ।
उनीहरूले सरकारी जग्गा नेताहरूले आफ्ना नाममा ल्याएकोमा विरोध गर्दै ‘नेता हुन् कि भूमाफिया ?’ भनेर प्रश्न पनि गरेका थिए।
दलका नेता, कार्यकर्ताहरूले बालुवाटारमा रहेको ११४ रोपनी जग्गा भूमाफियाबाट फिर्ता लिएर नागरिकका लागि उपयोग गर्न पनि सरकारको गम्भीर ध्यानाकर्षण गराएका छन् ।
प्रकाशित मिति: बुधबार, वैशाख ४, २०७६ १८:२५