४ जेठ, काठमाडौँ । नेकपा एमालेका सांसद राजेन्द्रप्रसाद पाण्डेले स्थानीय तहको निर्वाचन भएको ‘विभिन्न धाँधलीपूर्ण र आचारसंहिता उल्लङ्घन’का घटनाबारे संसदीय छानबिन समिति गठन गर्न माग गरेका छन । बिहीबारको संसद बैठकमा बोल्दै सांसद पाण्डेले उनले निर्वाचनमा सरकार र सत्तारुढ दलका तर्फबाट आचारसंहिताको उल्लङ्घन भएको, हिंसात्मक घटना गराइएको, स्रोतसाधनको दुरुपयोग गराइएको र अवैध हतियार प्रयोग गर्नेलाई कारबाही गर्ने प्रहरी अधिकृतलाई सरुवा गर्न खोजिएकामा आपत्ति जनाउँदै त्यसमा छानबिन हुनुपर्ने बताए । राप्रपाकी सांसद कुन्तीकुमारी शाहीले सरकार र सत्तारुढ दलका तर्फबाट निर्वाचनमा पैसा र शक्तिको प्रयोग भएको बताउँदै आगामी निर्वाचनमा त्यस्ता घटना नगराउन आग्रह गरिन । उनले निर्वाचनमा मारिएका अन्य जिल्लाकालाई सहिद घोषणा गरिएको तर कालीकोटमा मारिएका आफ्नातर्फका वडाध्यक्षका उम्मेदवार धनु बटालालाई सहिदको सूचीमा सरकारले समावेश नगरेकामा आपत्ति जनाइन । नेपाल मजदुर किसान पार्टीका प्रेम सुवालले दुई निर्वाचनका बीचमा सरकार परिवर्तन र बजेट प्रस्तुतिजस्ता काम आचारसंहिता विपरीत हुने बताउँदै स्थानीय तहको सङ्ख्या थप गर्ने काम पनि अनुचित हुने जिकिर गरे ।
प्रकाशित मिति: बुधबार, जेठ ३, २०७४ १९:१६
