१० चैत, काठमाडौं । नेकपा एमालेको स्थायी समिति बैठकले स्थानीय तहको निर्वाचनका लागि आफ्नो पार्टीका तर्फबाट उम्मेदवार छान्न मापदण्ड तोकेको छ । पार्टी अध्यक्ष केपी शर्मा ओलीको निवास बालकोट भक्तपुरमा बसेको बैठकले स्थानीय तहको निर्वाचनमा चयन गरिने उम्मेदवारको मापदण्ड तोकेको हो । बैठकले स्थानीय निर्वाचनको उम्मेदवार छनोटको मापदण्ड र विधि निर्धारण गरी पारित गरेको छ । सिनियर, पार्टीमा निरन्तर लागेको, पार्टीप्रति प्रतिवद्ध, आर्थिक तथा अनुशासनको कारबाहीमा नपरेको, समावेशी, स्थानीय विकास निर्माणको नेतृत्व गर्न सक्ने र स्थानीय स्तरमा लोकप्रिय हुनुपर्ने लगायतलको आधार मापदण्डमा समेटिएको छ । एमालेले उम्मेद्वार छनौटको बिधिको पनि टुंगो लगाएको छ । वडा अध्यक्ष र सदस्यको उम्मेदवार वडा कमिटीको सिफारिसमा, गाउँनगर कमिटीको राय सल्लाहमा जिल्ला कमिटीले टुंगो लगाउनेछ । गाउँपालिका र नगरपालिकाको प्रमुख र उपप्रमुखको उम्मेदवार सम्वन्धित तहको सिफारिस र जिल्लाको राय लिएर प्रदेश कमिटीले तय गर्नेछ । उपमहानर र महानगरका मेयर र उपमेयरको उम्मेदवार भने केन्द्रले नै छनोट गर्ने भएको छ । एमालेले स्थानीय तहमा कोही बागी उम्मेदवार उठे समर्थक प्रस्तावकसहितलाई कारबाही गर्ने जनाएको छ ।
प्रकाशित मिति: बुधबार, चैत ९, २०७३ १९:१६
