२ असार, काठमाडौँ । नेकपा एमालेका महासचिव इश्वर पोखरेलले नेपाली काँंग्रेसको योजनामा प्रदेश नम्बर २ को निर्वाचन सारिएको आरोप लगाएका छन । शुक्रबार प्रेस चौतारी नेपालले काठमाडौँमा गरेको अन्तरसंवादमा महासचिव पोखरेलले राजपालाई प्रयोग गरी कांग्रेसको योजनामा निर्वाचन सारिएको दाबी गरे । उनले भने ‘निर्वाचन सार्नु अघि कांग्रेसका तराई मधेशबाट प्रतिनिधित्व गर्ने सांसदहरुको बैठक बसेर समिक्षा गरियो, जसको अगुवाई निवर्तमान गृहमन्त्री विमलेन्द्र निधीले गरे र निर्वाचनमा पराजय भोग्ने भएपछि राजपालाई प्रयोग गरी निर्वाचन सारियो ।’ महाचिव पोखरेलले निर्वाचन सारेको सार्यै गरेर नटार्न सरकारलाई आग्रह गर्दै एमालेले सशक्त खबरदारी गर्ने बताए ।
महासचिव पोखरेलले असोजमा चुनाव सार्नु भनेको चुनाव नगराउने षडयन्त्र भएको भन्दै मधेशका जनतालाई सत्तापक्ष विरुद्ध उतार्ने चेतावनी पनि दिए । चुनाव सार्दा दूरगामी असर पर्छ,’ उनले भने, ‘यसरी निर्वाचन सार्दा प्रदेश र केन्द्रीय निर्वाचनमा पनि असर पुग्छ । पोख्रेलले निर्वाचन सार्दा एमालेसँग मात्र नभई निर्वाचन आयोगसँग समेत सल्लाह नगरेको भन्दै संसदको म्याद थप्ने षडयन्त्रले त्यसो गरेको हुन सक्ने आशंका व्यक्त गरे । ‘जनप्रतिनिधि संस्थालाई भङ्ग गर्नेहरु अहिले सत्तामा छन् । त्यसैले उनीहरुले त्यो प्रयास नगर्लान भन्न सकिन्न,’ उनले भने, ‘एमाले त्यसमा सजग छ । कुनै पनि हालतमा त्यो प्रयास सफल हुन दिदैनौँ ।’ उनले पहिलो चरणमा तीन प्रदेशमा भएको निर्वाचनमा एमाले पहिलो भएको भन्दै दोस्रो चरणको निर्वाचनमा पनि एमाले पहिलो नै हुने दाबी गरे । ‘एमालेले दोस्रो चरणको चुनावमा पहिलो चरणको भन्दा राम्रो परिणाम ल्याउँछ,’ उनले भने, ‘हामीले बिभिन्न रिपोर्ट र हाम्रो शक्तिको आधारमा भनेका छौं,दोस्रो चरणमा पहिलो चरणको भन्दा राम्रो परिणाम ल्याउँछौं । बहुमत प्राप्त गर्छौं ।’ पाेखरेलले दोस्रो चरणमा हुने तीन प्रदेशमा रहेको एक मात्र महानगरपालिका विराटनगर महानगरपालिकामा तालमेल हुने संकेत गरेका छन् । ‘हामीले. अहिले त्यहाँ मेयर मात्र तोकेका छौँ,’ उनले भने, ‘त्यसले पनि थाहा हुन्छ ।
एमाले त्यहाँ तालमेल गर्न चाहन्छ ।’ उपेन्द्र यादवको संघीय फोरमसँग तालमेल हुन सक्ने सम्भावना कत्तिको छ भनी सोधेको प्रश्नमा उनले भने– तालमेलको ढोका खुला राख्नकै लागि उपमेयर उम्मेदवार नउठाइएको हो । कुन पार्टीसँग तालमेल गर्ने भन्ने टुंगो लोगेको छैन । कसैसँग गर्यौँ भने तपाईँहरुलाई थाहा भैहाल्छ नि ?’ उनले एमाले देशभरी आफ्नै सामथ्र्यमा चुनाव लड्न सक्ने भएको भन्दै सत्ताधारीहरुले देशभर गठबन्धन गरिरहेका बेला विराटनगरमा तालमेलको सम्भवना हुनुलाई अनौठौ मान्नु नुहुने बताए । कार्यक्रम प्रेस चौतारीका अध्यक्ष गणेश बस्नेतको अध्यक्षतामा सम्पन्न भएको हो । चौतारीले दोस्रो चरणको निर्वाचनका क्रममा अन्तरसंवाद कार्यक्रम जारी राख्ने जानकारी दिएको छ ।
प्रकाशित मिति: बिहीबार, असार १, २०७४ १९:१६
