चितवन । चितवन मेडिकल कलेजले २ घण्टामा नै कोरोनाको पिसिआर परीक्षणको नतिजा दिन थालेको छ ।
अस्पतालले र्यापिड एन्टिजेन टेस्टमार्फत छिटो नतिजा दिन आजदेखि सो सेवा सुरुआत गरेको हो । यसका लागि ३ हजार रुपैयाँ तिर्नुपर्ने हुन्छ।
कलेजको प्रयोगशालामा गएको १ महिनामा ५ हजार २ सय ९२ जनाको कोरोनाको पिसिआर परीक्षण गरिएकाे छ । तीमध्ये ९ सय ५३ जनामा कोरोना संक्रमण पुष्टि भएको थियो।
कलेजले गत भदौ ३ गतेबाट पिसिआर परीक्षण थालेको हो। कलेजका सञ्चार संयोजक डा किशोर अधिकारीका अनुसार संक्रमितमध्ये ५५६ जना पुरुष र ३९७ जना महिला रहेका छन्। कूल सङ्ख्यालाई हेर्दा परीक्षण गरिएकामध्ये १८ प्रतिशतमा कोरोना संक्रमण देखिएको हो।
संक्रमण भई अस्पतालमा उपचाररतमध्ये हालसम्म १३ जनाको मृत्यु भएको छ। अस्पतालले २२१ जना संक्रमितको उपचार गरिसकेको जनाएको छ। हाल अस्पतालमा ९७ जना उपचाररत रहेका छन्। उनका अनुसार तीनजना भेन्टिलेटर र ४३ जनाको कोभिड सघन उपचार कक्षमा उपचार भइरहेको छ। अन्यको अवस्था सामान्य छ। अस्पतालमा उपचारका क्रममा रहेकामध्ये ४५ पुरुष र ५२ महिला रहेका छन्।
कलेजका अध्यक्ष एवं प्रबन्ध निर्देशक प्राडा हरिशचन्द्र न्यौपानेले ४ करोडभन्दा बढी खर्च गरेर प्रयोगशाला स्थापना गरिएको जानकारी दिए। नेपालमा नै निजी क्षेत्रबाट कोरोना रोगको परीक्षण र उपचारमा आफ्नो मेडिकल कलेजको भूमिका नेतृत्वदायी भएको उनको भनाइ छ।
सरकारको निजी क्षेत्र प्रतिको धारणा सकारात्मक हुन सकेमा रोग नियन्त्रण र उपचारमा निजी क्षेत्रले थप योगदान गर्न सक्ने उनले जानकारी दिए।
कलेजले हाल २ हजार रुपैयाँ मात्र लिएर पिसिआर परीक्षण गर्दै आएको छ। भरतपुर अस्पतालको प्रयोगशालामा परीक्षण गर्न ढिला भएका नमूनाहरुको परीक्षण पनि कलेजले गर्दै आएको छ। स्वास्थ्य बीमा पिसिआर परीक्षणमा लागू भएमा सहज हुने निर्देशक डा न्यौपाने भनाइ छ।
जिल्लामा भरतपुर अस्पतालको कोभिड–१९ प्रयोगशाला र बिपी कोइराला मेमोरियल क्यान्सर अस्पतालको प्रयोगशालामा नमूना परीक्षणको काम भइरहेको छ। रासस
प्रकाशित मिति: आइतबार, असोज ४, २०७७ १४:०८
