डाेटी । जिल्लाको पहिलो कोरोना संक्रमित अस्पतालबाट डिस्चार्ज भई घर फर्किएका छन् ।
भारतबाट फर्किएका जिल्लाको शिखर नगरपालिका वडा ३ का २५ वर्षीय युवक १५ दिन जिल्ला अस्पताल डोटीको आइसोलेसन वार्डमा रही कोरोनालाई जितेर बिहीबार घर फर्किएको अस्पतालले जनाएको छ।
अहिले ती युवकलाई कोरोनाको कुनै लक्षण नदेखिएपछि डिस्चार्ज गरिएको अस्पतालका प्रमुख तथा निमित्त मेडिकल सुपरीटेन्डेन्ट डा.ज्योति पाण्डेले बताए ।
उनले भने, ‘संक्रमित युवकलाई हामीले १५ दिन आइसोलेसन वार्डमा राखेका थियौँ, उनमा कोरोनाको थप कुनै लक्षण नदेखिएपछि आइसोलेसन व्यवस्थापनसम्बन्धी राष्ट्रिय निर्देशिका अनुसार डिस्चार्ज गरेका छौँ ।’
संक्रमित युवकलाई यही जेठ १९ गते कोरोनाको संक्रमण पुष्टि भएको थियो । त्यसअघि उनका छोरामा स्वास्थ्य समस्या देखिएपछि श्रीमती र छोरासहित जिल्ला अस्पताल डोटीको आइसोलेसनमा राखेर ‘थ्रोट स्वाब’ लिएर पिसिआर परीक्षण गरिएको थियो ।
दुवैकोे नतिजा नेगेटिभ देखिएको थियो । डोटीका थप ५ जना अन्य संक्रमितलाई आइसोलेसनमा राखिएको छ ।
प्रकाशित मिति: शुक्रबार, जेठ ३०, २०७७ ०६:५०
