काठमाडाैं । कपिलवस्तुमा नर्ससहित ११ जना कोरोनामुक्त भई घर फिर्ता भएका छन् ।
कपिलवस्तु अस्पतालमा कार्यरत् नर्स कोरोना भाइरसको संक्रमणबाट मुक्त भएको जनाउँदै सोमबार घर फिर्ता भएपछि जिल्लामा कोरोना भाइरसलाई जितेर घर जानेको संख्या बढेको छ ।
गत वैशाख ३० गते पहिलोपटकको रिपोर्टमा ‘पोजिटिभ’ आएपछि नर्सलाई अस्पतालको ‘आइसोलेसन’मा राखिएको थियो ।
कपिलवस्तु नगरपालिका तौलिहवा निवासी २५ वर्षीया नर्सलाई घर पठाइएको हो ।
नर्स संक्रमित भएपछि अस्पतालका कर्मचारी र परिवारसहित ११० को ‘पिसिआर’ जाँच गर्दा ‘नेगेटिभ’ आएको थियो ।
नर्सको क्रमशः दोस्रो र तेस्रोपटक यही जेठ १ र ४ गते २ पटक जाँच गर्दा रिपोर्ट नेगेटिभ आएको थियो ।
नेपालमै पहिलो स्वास्थ्यकर्मी संक्रमित भएर १४ दिनमै कोरोनालाई जित्न सफल भएको अस्पतालका डा. किशोर बञ्जाडेले बताए ।
उनलाई थप १ साता ‘होम क्वारेन्टाइन’मा बस्न सुझाव दिइएको छ ।
शनिबार कपिलवस्तु नगरपालिका तथा मायादेवी र यशोधरा गाउँपालिकाका ३/३ र बुद्धभूमि नगरपालिकाका १ जनालाई बुटवलको कोरोना विशेष अस्पतालबाट घर पठाइएको थियो ।
कपिलवस्तुमा सोमबारसम्म ८३ कोरोना संक्रमण देखिएको छ ।
प्रकाशित मिति: सोमबार, जेठ १२, २०७७ ०८:३५
