काठमाडाैं । मुटुमा समस्या देखिएपछि बिहीबार राति नै अस्पताल भर्ना भएका प्रधानमन्त्री केपी शर्मा ओलीलाई शुक्रबार डिस्चार्ज गर्ने तयारी भइरहेको बताइएकाे छ ।
उनी शुक्रबार नै डिस्चार्ज हुने प्रधानमन्त्रीका प्रेस सल्लाहकार सूर्य थापाले प्रधानमन्त्रीका निजी चिकित्सक दिव्या सिंह शाहलाई उद्धृत गर्दै जानकारी दिएका हुन् ।
प्रधानमन्त्री ओलीलाई काठमाडाैंको महाराजगन्जमा रहेको त्रिवि शिक्षण अस्पतालअन्तर्गतकाे मनमोहन कार्डियोथेरासिक भास्कुलर एन्ड ट्रान्सप्लान्ट सेन्टरमा राखिएको छ ।
मुटुको चाल बढेपछि अस्पताल भर्ना भएका ओलीको स्वास्थ्यमा अहिले सुधार भइरहेको मुटु रोग विशेषज्ञ डा. अरुण सायमीले जानकारी दिए ।
यसअघि गएको फागुन २१ गते दोस्रो पटक मिर्गौला प्रत्यारोपण गरेपछि ओलीलाई ३० गते अस्पतालबाट सरकारी निवास बालुवाटार फर्काइएको थियो ।
ओलीलाई डिस्चार्ज गर्ने बेला उनको उपचारमा संलग्न चिकित्सकले उनी अझै पनि संक्रमणको जोखिममा रहेको भन्दै कडा सावधानी अपनाउन सुझाव दिएका थिए।
