भक्तपुर : विभिन्न माग राखेर अनशनसहितको आन्दोलनमा उत्रिएका भक्तपुरस्थित शहीद धर्मभक्त राष्ट्रिय (मानव अङ्ग) प्रत्यारोपण केन्द्रका ११ जना नर्सलाई प्रहरीले आज पक्राउ गरेको छ । शान्तिपूर्ण धर्नामा बसेका ११ जना नर्सलाई महानगरीय प्रहरी परिसर भक्तपुरका प्रहरीले पक्राउ गरेको हो ।
आन्दोलनको नेतृत्वकर्ता नर्स त्रजिना जतीले बिरामीको सेवा सुचारु राख्दै शान्तिपूर्ण धर्नामा बसेका नर्सलाई अस्पताल प्रशासनले प्रहरी लगाई पक्राउ गरेको बताइन् । उनले भनिन्, अनशनमा बसेकाको अवस्था गम्भीर भयो, हामी शान्तिपूर्ण धर्नामा बसेका थियौँ, प्रहरीले माथिको आदेश भन्दै हट्न भने, हामीले मानेनौँ, त्यसपछि आन्दोलनमा रहेका नर्सलाई लछारपछार गर्दै भ्यानमा हालेर लगियो ।
जतीका अनुसार आज आन्दोलनरत नर्सले राती ड्युटीमा रहेका नर्सलाई भित्रबाट बाहिर आउन नदिएको र बाहिरबाट नर्सलाई भित्र जान नदिई धर्नामा बसेका थिए । हामीले बिरामीको सेवा रोकेका थिएनौँ, भित्र रहेका नर्सहरूलाई बाहिर नआई भित्रै बसेर बिरामीको सेवा गर्न भनेका थियौँ , जतीले भनिन्, बाहिर रहेका नर्सलाई भित्र नजान भनेका थियौँ तर बिरामी र कुरुवालाई जान रोकेका थिएनौँ, सेवा बन्द गराएका पनि छैनौँ तर अस्पताल प्रशासनले प्रहरी लगाएर पक्राउ गर्यो ।
पक्राउपर्नेमध्ये शान्ति कुमाल, अनु शाही, शर्मिला लामा, मीना गर्बुजा, रविता सुवाल, सजिना मानन्धर, मुना श्रेष्ठलाई प्रहरीवृत्त जगातीको हिरासतमा र सविता श्रेष्ठ, सङ्गीता मङ्ग्राती, सजना देउला र त्रजिना जतीलाई प्रहरीवृत्त थिमीको हिरासतमा राखेको छ ।
गत वैशाख ११ गतेदेखि आन्दोलनमा उत्रिएका नर्सलाई अस्पताल प्रशासनले पक्राउ गर्न लगाई तेस्रो पटक हिरासतमा पुर्याएको हो । आन्दोलनरत नर्समध्ये केन्द्रमा कार्यरत स्टाफ नर्स डिक्की शेर्पा र पोखराकी नर्स जिता बराल विगत आठ दिनदेखि आमरण अनशनमा बस्दै आएका छन् । उनीहरूको स्वास्थ्य अवस्था जटिल बनेको छ । अनशनमा बसेका नर्सको स्वास्थ्य अवस्था निकै नाजुक बन्दै जाँदा पनि माग सम्बोधन गर्ने चासो नदिएपछि नर्सले अस्पतालमै धर्ना दिन सुरु गरेपछि प्रहरीले हस्तक्षेप गरेको हो ।
केन्द्र स्थापनादेखि कार्यरत नर्स तथा कर्मचारीलाई आन्तरिक प्रतिस्पर्धाबाट स्थायी गरिनुपर्ने, काम र अनुभव हेरेर बढुवा गर्नुपर्ने, जोखिमभत्ता प्रदान गर्नुपर्ने, काम गर्दै आएका नर्सलाई प्रोत्साहन गर्नुपर्ने, राष्ट्रिय तथा अन्तर्राष्ट्रियस्तरमा हुने सम्मेलनमा कार्यरत कर्मचारीलाई अवसर दिनुपर्नेलगायतका माग राख्दै नर्स आन्दोलनमा उत्रिएका हुन् । आफ्ना मागविपरीत स्थायी पदपूर्तिका लागि लोकसेवा आयोगले खुला प्रतिस्पर्धामा दर्खास्त आह्वान गरी केन्द्रका निर्देशक डा. पुकारचन्द्र श्रेष्ठ र पहुँचवालाका व्यक्तिलाई स्थायी गर्ने र स्थापनाकालदेखि कार्यरत नर्सलाई निश्काषन गर्ने षडयन्त्र गरेको उनीहरूको आरोप छ ।
आन्दोलन र अनशनका कारण बिहीबार केन्द्रले लोकसेवा आयोगलाई पत्र पठाई परीक्षा स्थगन गर्न आग्रहसमेत गरे पनि दर्खास्त फाराम बुझाउने आज अन्तिम दिनसम्म पनि लोकसेवाको सूचना रद्द नभएपछि आजदेखि नर्स धर्नामा बसेका थिए । केन्द्रमा हाल ९६ जना स्टार्फ कार्यरत छन् भने नर्सको स्थायी पदपूर्तिका लागि गत वैशाख १३ गते लोकसेवा आयोगले ९६ पदमै स्थायी दरबन्दीको सूचना प्रकाशित गरेको थियो ।
यता, अस्पताल प्रशासनले भने नर्सको आन्दोलनले आजदेखि सबै सेवा ठप्प भएको जनाएको छ ।
आन्दोलनका कारण डायलाइसिसलगायतका अधिकांश सेवा ठप्प हुँदा बिरामी मर्कामा परेको प्रशासनको भनाइ छ । मिर्गौलापीडित सरोकार समाज नेपालका अध्यक्ष बलराम सुवेदीको नेतृत्वमा गएको मिर्गौलापीडित बिरामी तथा नर्सले आज जिल्ला प्रशासन कार्यालय भक्तपुर घेराउ गरी नाराबाजी गरेका छन् । अस्पतालको शैयामा डायलाइसिस गराउनुपर्ने बिरामीहरूले आफ्नो स्वास्थ्य रक्षाको माग गर्दै प्रशासन कार्यालय घेराउ गरी नाराबाजी गरेका हुन् ।
समाजका अध्यक्ष सुवेदीसहितको टोलीले घेराउ गर्दै शहीद धर्मभक्त राष्ट्रिय प्रत्यारोपन केन्द्रको स्थायी दरबन्दीको दर्खास्त आह्वानको सूचना रद्द गर्नुपर्ने, अस्थायी एवं करारमा नियुक्ति पाई कार्यरत कर्माचारीको उचित व्यवस्था गर्न र आन्दोलनका कारण रोकिएको मिर्गौला डाइलाइसिसलगायतको सेवा सञ्चालन गर्न माग गरेका छन् । उनीहरूले प्रमुख जिल्ला अधिकारी नारायण भट्टलाई भेट गरी तत्काल समस्या समाधान गर्नसमेत माग गरेका छन् ।
