बाजुरा : जिल्लाको हिमाली गाउँपालिका–५ बँच्छ्या, क्युडी त्यस्तै ६ नं वडाको पाडीमा फैलिएको भाइरल ज्वरोको संक्रमण अहिले सामान्य हँुदै गएको छ । सिंगो गाउँ नै प्रभावित हुने गरी फैलिएको संक्रमण दिनप्रतिदिन सामान्य हुँदै गएको जिल्ला स्वास्थ्य कार्यालयले बताएको छ ।
रोगको संक्रमणबाट प्रभावित बिरामी निको हुँदै गएका छन् भने थप व्यक्तिमा संक्रमण नदेखिएको कार्यालय प्रमुख अशोक सिंहले जानकारी दिए । गाउँमा चार दिनदेखि स्वास्थ्यकर्मीको टोली उपचारार्थ खटिरहेको छ । संक्रमण फैलिएको प्रत्येक गाउँमा स्वास्थ्यकर्मी खटिएका छन् । संक्रमणका कारण ६ नम्बर वडा पाडीमा १४०, ५ नम्बर बिच्छ्यामा ४० र क्युडीमा ९३ स्थानीयवासी बिरामी परेका थिए । उपचारपछि सबैजसो बिरामी सामान्य अवस्थामा आइपुगेका छन् ।
समयमै उपचार नपाउँदा क्युडीगाउँकी ५५ वर्षीया छञ्चकला बुढाको ज्यान गएको छ भने पाँडीका दुई वृद्ध थला परेका छन् । उमेरले ८० कटेका दुवैमा रुघाखोकी निको भए पनि थप अरु संक्रमण देखिएको बुझिएको छ । तर पनि स्वास्थ्यकर्मीले उपचार सेवा दिइरहेका छन् । जिल्ला स्वास्थ्य कार्यालयका अनुसार तीन वटै गाउँमा स्वास्थ्यकर्मी खटिएका छन् ।
औषधिसहित क्युडीमा अहेव माया पाण्डे र अनमी चन्द्रा थापा, बच्छ्यामा अहेव धनबहादुर फँडेरा, पाडीमा हेल्थ असिस्टेन्ट धर्मदत्त बुढा, अहेव वासुदेव पाण्डेको टोली खटिएको छ । कुनै प्रकारको उपचार सेवा र औषधिको कमी नहुने गरी टोली खटाइएको गाउँपालिकाका अध्यक्ष गोविन्द्र मल्लले बताए ।
संक्रमित गाउँमा आवश्यकभन्दा दुईगुणा बढी औषधि पठाइएको जिल्ला स्वास्थ्य कार्यालयले बताएको छ । प्रदेश सरकार मातहतमा रहने कार्यालय भएकाले प्रदेश सरकारसँगको परामर्शमा गतिविधि अगाडि बढाइएको कार्यालय प्रमुख सिंहको भनाइ छ ।
आठ सय बिरामीलाई पुग्ने गरी आठ हजार ट्याब्लेट पारासिटामोल र दुई हजार क्नालोर फेनरामिन नामक औषधि जिल्ला स्वास्थ्य कार्यालयबाटै पठाइएको छ । यस्तै गाउँपालिकाले पनि आफूसँग भएको औषधिसहित टोली गाउँ पठाएको छ भने थप संक्रमण हुने आशङ्काका आधारमा थप औषधिको माग गरेको छ ।
भाइरल ज्वरोको संक्रमण हुम्लाको ताँजाकोटबाट फैलिएको स्वास्थ्यकर्मीले अनुमान गरेका छन् । ताँजाकोटमा १० बढीले ज्यान गुमाएका छन् । सँगै जोडिएका छिमेकी गाउँ भएकाले छिटो संक्रमण फैलिएको र केही समस्या मौसम परिवर्तनले पनि निम्त्याएको उपचारमा संलग्न अहेव धनबहादुर फँडेराले बताए ।
बिरामीको अवस्थामा सुधार हँुदै आए पनि पूर्णरूपमा निको हुन एक साता बढी लाग्ने स्वास्थ्यकर्मीको भनाइ छ । भाइरल ज्वरो कम्तीमा पनि पूर्ण नियन्त्रणमा आउन दुई साता लाग्ने उनीहरुको भनाइ छ । सबैजसो बिरामी परेपछि त्रासमय बनेको गाउँको अवस्था पनि सामान्य हुँदै गएको छ । बिरामीमा रुघाखोकी लाग्ने, टाउको दुख्ने, ज्वरो आउनेजस्ता लक्षण देखापरेका छन् । संक्रमण पाका उमेर र कलिला उमेर समूहकालाई देखिएको छ ।
यता जिल्ला स्वास्थ्य कार्यालयले स्थानीय तहका स्वास्थ्य शाखासँग नियमित सम्पर्क जारी राखेको छ । भाइरल ज्वरो सर्ने खतरा बढी भएकाले पूर्वतयारीस्वरूप आवश्यक परामर्श र सम्पर्क जारी राखेको कार्यालय प्रमुख अशोक सिंहको भनाइ छ । हुम्लाको ताँजाकोटबाट रोगको संक्रमण बाजुराको क्युडी, पाडी, बिँच्छ्यामा फैलिएको र अन्य क्षेत्रमा पनि सर्नसक्ने अनुमानका आधारमा तयारी अवस्थामा बस्न निर्देशनसमेत गरिएको छ ।
हुम्लासँग जोडिएका हिमाली गाउँपालिकासहित, स्वामिकात्र्तिक खापर, जगन्नाथ गाउँपालिका र बुढीनन्दा नगरपालिकाले उच्च सतर्कता अपनाएका छन् । औषधिको जोहोसहित स्वास्थ्यकर्मीलाई समेत तयारी अवस्थामा राखिएको छ । –रासस
प्रकाशित मिति: मंगलबार, वैशाख २४, २०७६ १३:४४
