काठमाडौैं : त्रिभुवन विश्वविद्यालयले अबदेखि स्नातक तह प्रथम वर्षको परीक्षा फाराम विद्यार्थीले अनलाइनमार्फत् भर्ने व्यवस्था गर्न लागेको छ । त्रिविले अब परीक्षा हुने स्नातक तह प्रथम वर्षको परीक्षाको फाराम अनलाइनमार्फत् भर्ने व्यवस्था गर्न लागेकाे परीक्षा नियन्त्रण कार्यालयका परीक्षा नियन्त्रक पुष्पराज जोशीले जानकारी दिए ।
‘हामीले अब परीक्षा दिने स्नातक तह प्रथम वर्षका विद्यार्थीको परीक्षा फाराम अनलाइनमार्फत भर्ने व्यवस्था गरेका छौं’, उनले भने, ‘अहिले पढिरहेका स्नातक तह प्रथमका सबै विद्यार्थीले फारम अनलाइनमार्फत् भर्ने छन् ।’
अहिले क्याम्पसले नै भरिदिने व्यवस्था गरेको अनलाइन फारामपछि विद्यार्थीले आफैँले भर्न सक्नेछन् । यसरी विद्यार्थीले अनलाइनमार्फत् भरेका परीक्षा फारामको प्रवेश पत्र आफैँले नै प्रिन्ट गरेर लिन पाउने उनले बताए । उनीहरू आफैँले प्रिन्ट गरेको प्रवेशपत्र लिई परीक्षामा सहभागी हुन पाउने छन् । यसैगरी त्रिविले अबदेखि फोटोसहितको रजिस्ट्रेसन स्लिप लागू गर्ने भएको छ ।
परीक्षा नियन्त्रक जोशीले अब नयाँ रजिस्ट्रेसन स्लिप लिने विद्यार्थीले फोटोसहितको हुने बताए । उनले अबदेखि परीक्षामा अनलाइनमार्फत् भरेको फारामको प्रवेशपत्रसँगै फोटोसहितको रजिस्ट्रेसन स्लिप लिएर जानुपर्ने बताए । ‘हामीले अबदेखि अनलाइनमार्फत् भरेको फाराममा रहेको प्रवेशपत्र प्रिन्ट गरेर परीक्षामा सहभागी हुन पाउने व्यवस्था गर्दैछौँ’, उनले भने, ‘उक्त प्रवेशपत्रसँगै फोटोसहितको रजिसट्रेसन स्लिप अनिवार्य लैजानु पर्दछ ।’
मार्कसिट आफैँले प्रिन्ट गर्न पाउने
यसैगरी पनिकाले विद्यार्थीको लब्धाङ्क पत्र (मार्कसिट) क्याम्पस आफैँले प्रिन्ट गरेर दिन सक्ने व्यवस्था गर्न लागेको छ । नयाँ वर्षदेखि लागू हुने गरी स्नातक तह प्रथम वर्षका विद्यार्थीलाई क्याम्पसले आफैँले प्रिन्ट गरेर मार्कसिट दिने व्यवस्था गर्न थालेको परीक्षा नियन्त्रक जोशीले बताए ।
ट्रान्सक्रिप्टमा स्टार चिह्न नहुने
यसैगरी त्रिविले अबदेखि ट्रान्सक्रिप्टमा अनुत्तीर्ण भएको विषयमा तारा (स्टार) चिह्न नराख्ने भएको छ । त्रिवि प्राज्ञिक परिषद्ले अनुत्तीर्ण भएको विषयसहितको ट्रान्सक्रिप्टमा स्टार चिह्न नराख्ने निर्णय गरेसँगै स्नातक तह प्रथम वर्षका विद्यार्थीले यो सुविधा पाउने भएका छन् । ट्रान्सक्रिप्टमा तारा चिह्न राख्दा नराम्रो देखिने भएकाले त्यसलाई हटाउन लागेको जोशीले बताए । –रासस
प्रकाशित मिति: शनिबार, चैत २३, २०७५ १३:४५
