काठमाडाैं । शुक्रबारदेखि परेको पानीले दाङमा पौने ८ करोड रुपैयाँ बराबरको इँटा नोक्सान भएको छ । जिल्लामा रहेका ३२ इँटा उद्योगमा पोल्नका लागि तयार पारिएका सवा २ करोड काँचो इँटा पानीले भिज्दा ७ करोड ७७ लाख रुपैयाँबराबरकाे क्षति भएको हो ।
दाङ देउखुरी इँटा व्यवसायी संघका अध्यक्ष रोम वलीका अनुसार २ करोड २२ लाख काँचो इँटा पानीले भिजेका कारण नष्ट भएको हो । काँचो इँटाको मूल्य साढे ३ रुपैयाँ प्रतिगोटा रहेको र त्यसअनुसार ७ करोड ७७ लाखको नोक्सानी भएको अध्यक्ष वलीले जानकारी दिए ।
घोराही क्षेत्रमा १४ तथा तुलसीपुर क्षेत्र र लमही क्षेत्रमा ९-९ वटा इँटा उद्योग छन् । इँटा ओताउने तयारीसमेत गर्न नभ्याएका कारण एक्कासि पानी परेकाले विगतका वर्षमा भन्दा धेरै नोक्सान भएको अध्यक्ष वलीको भनाइ छ । इँटा पार्ने साँचोबाट इँटा झरेपछि लगानीकर्ताको जिम्मा हुने भएका कारण मजदुरभन्दा उद्योगी मारमा परेको व्यवसायीहरु बताउँछन् ।
यसैबीच ठूलो मात्रामा इँटा नोक्सान भएपछि मूल्य बढ्ने देखिएको छ । अहिले पाकेको इँटाको मूल्य १३ रुपैयाँ प्रतिगोटा छ । निकै धेरै क्षति भएकाले इँटाको मूल्य बढ्न सक्ने अध्यक्ष वलीको भनाइ छ ।
नवलपुरमा ५ करोडको क्षति
यसैरी वर्षाका कारण नवलपुरका इँटा उद्योगमा पनि ५ करोड बराबरको क्षति भएको छ । अकस्मात भएको वर्षाका कारण नवलपरासी पूर्व नवलपुरमा रहेका इँटा उद्योगमा तयारी अवस्थामा रहेका काँचो इँटामा पानीले क्षति पुर्याएको हो ।
वर्षाका कारण जिल्लाका ९ इँटा उद्योगमा भट्टीमा पकाउनुपूर्व (मोडलिङ गरेर राखिएको) तयारी अवस्थामा राखिएको काँचो इँटामा क्षति पुगेको हो । यहाँ रहेका ९ उद्योगमा गरेर १ करोड काँचो इँटामा क्षति पुगेको नवलपुर इँटा उद्योग संघका सचिव कृष्ण गौतमले जानकारी दिए । १ करोड इँटाको लागतअनुसार करिब ५ करोड बराबरको क्षति भएको सचिव गौतमले जानकारी दिए ।
नवलपरासी पूर्व नवलपुरमा रहेका रहेका नारायणी इँटा उद्योग कुजौली, पशुपति इँटा उद्योग दुम्कौली, माता मनकामना इँटा उद्योग केउरेनी, केसी इँटा उद्योग मगरकोट, नेपाल इँटा उद्योग मगरकोट, कावासोती इँटा उद्योग हेगौली, देवचुली इँटा उद्योग ढोकी, मनकामना इँटा उद्योग मध्यविन्दु मदनपुर र ट्रावा इँटा उद्योग मदनपुर मध्यविन्दुको इँटा उद्योग गरी ९ वटा इँटा उद्योगमा क्षति भएको छ । रासस
प्रकाशित मिति: आइतबार, मंसिर २९, २०७६ ०७:४७
