अझै अन्योलमा कुलेखानी तेस्रो

अर्थ

आजको न्युज बुधबार, साउन १५, २०७६ १९:०९

फाइल तस्वीर

मकवानपुर ः निर्माणाधिन कुलेखानी तेस्रो जलविद्युत आयोजनाको परीक्षण उत्पादनमै अन्योलता बढेको छ । विगत ११ वर्षदेखि निर्माणाधिन आयोजनाको असार मसान्तबाट परीक्षण उत्पादन सरु हुने भनिए पनि निर्माणको ठेक्का पाएको चीनको जेजियाङ जियालिङ कम्पनीले आवश्यक प्राविधिक समयमै नल्याउँदा परीक्षण उत्पादन अन्योलमा परेको हो ।

आयोजना प्रमुख सुवास मिश्रकाअनुसार असार दोस्रो साता नै कुलेखानीको विद्युतगृहमा जडान गरिएका उपकरणको पहिलो चरणको परीक्षण सफलतापूर्वक सम्पन्न भएको थियो । अन्तिम परीक्षणका लागि आवश्यक प्राविधिक समयमै नआउँदा तोकिएको समयमा उत्पादन परीक्षण सुरु हुन नसेको हो । चिनियाँ कम्पनीले ल्याउनुपर्ने प्राविधिक नल्याउँदा तोकिएको समयमा परीक्षण उत्पादन गर्न नसकिएको आयोजना प्रमुख मिश्रले बताए ।

आयोजनाको निर्माण सम्पन्नको लागि आयोजनामा कार्यरत सबैले धेरैपटक आग्रह गरे पनि ठेक्का पाएको कम्पनी गम्भीर नहुँदा ढिलाई भइरहेको छ । उनले भने, ‘चिनिया प्राविधिकले परीक्षण गरेपछि विद्युत उत्पादन सुरु हुनेछ ।’ आयोजना प्रमुख मिश्रले उत्पादनसँगै राष्ट्रिय प्रसारणमा जोड्नका लागि एउटा टावर निर्माण गर्ने र तार तान्ने काम मात्र बाँकी रहेको बताए । मिति नै तोक्ने अवस्था नरहे पनि लगभग सबै काम सकिएकाले छिट्टै नै राष्ट्रिय प्रसारण लाइनमा जोड्ने काम सम्पन्न गरिने उनको भनाइ छ ।

एउटा टावरको २० प्रतिशत काम मात्रै सकिन बाँकी छ । यस आयोजनाको सिभिल र मेकानिकलतर्फको काम अन्तिम चरणमा पुगे पनि परीक्षण उत्पादन नै सरु नहुँदा मुख्य समस्या भएको उनले गुनासो गरे । वार्षिक सरदर ४० दशमलव ६५ गिगावाट घण्टा विद्युत् उत्पादन गर्ने क्षमता रहेको यस आयोजनाको काम सन् २०१२ मा सम्पन्न गर्ने लक्ष्यका साथ सन् २००८ अप्रिल २७ देखि निर्माण सरु भएको थियो ।

आयोजना ठेकेदार कम्पनी, प्राधिकरणको ढिलासुस्ती र स्थानीयको अवरोधका कारण तोकिएको समयमा काम सम्पन्न हुन नसकेको हो । दुई अर्ब ४३ करोडमा निर्माण भइरहेको आयोजनाको लागत वृद्धि भएर ४ अर्ब ६३ करोड पुगे पनि अझै उत्पादन मिति भने सुनिश्चित भइसकेको छैन ।रासस

प्रकाशित मिति: बुधबार, साउन १५, २०७६ १९:०९

प्रतिक्रिया दिनुहोस्