काठमाडौं : काठमाडौंको कपन चुनिखेलका दुई युवाले संकलन गरेका नेपाली तथा विदेशका प्राचीन मुद्रा विभिन्न स्कूलमा प्रदर्शनी गर्न सुरु गरेका छन् । बूढानीलकण्ठ नगरपालिका–१३ चुनिखेलका युवा सरोज श्रेष्ठ र दिनेश श्रेष्ठले संकलन गरेका नेपाली पुराना मुद्रा र विदेशी मुद्राको प्रदर्शनी सुरु गरेका हुन् ।
प्राचीन वस्तुलाई जीवन्त बनाऔँ (लेट अस मेक एन्टिक अलाइभ) भन्ने नाराका साथ स्थानीय युवाले मुद्रा चिनाउने कार्यमा सहयोग गरिरहेका छन् । करिब ५० देशका ९० भन्दा बढी मुद्राको प्रदर्शनी चुनिखेल नौलिन माध्यमिक विद्यालयबाट सुरु गरिएको छ । अभियन्ता युवाले पुराना नेपाली तथा विभिन्न देशका मुद्रा ठूलो फ्रेममा राखी प्रदर्शनी अभियान सुरु गरेका छन् । उनहरूले बूढानीलकण्ठका विभिन्न विद्यालयमा प्रदर्शनी गरिसकेका छन् ।
त्यसैको निरन्तरता स्वरूप आज बिहान बूढानीलकण्ठ–१३ स्थित पिक पोइन्ट एकेडेमी नेटवर्कबाट सञ्चालित नवपुर चिल्ड्रेन होम स्कूलमा प्रदर्शनी गरेका थिए । अभियन्ता सरोजले आफ्नो मामा डा. ईश्वर नगरकोटीबाट प्रेरित भएर संकलन गरेका मुद्रा प्रदर्शनीमा राख्ने गरेको बताए ।
नेपालमा पहिलोपटक प्रचलनमा आएको कागजी मुद्रादेखि हालसम्मको कागजी नोटसम्म प्रदर्शनीमा राखिएको थियो । त्यसैगरी भारत, पाकिस्तान, केन्या र सियरालियोनलगायतका कागजी मुद्रासमेत रहेका छन् । सो प्रदर्शनीमा विद्यार्थी र अभिभावकले सो मुद्राको अवलोकन गर्नुका साथै विभिन्न देशका मुद्राको विषयमा अभियन्ताबाट जानकारी प्राप्त गरेका थिए ।
प्रदर्शनीमा स्कूलका विद्यार्थीलाई सरोजले कागजी मुद्राको इतिहास, मुद्राको विकास र मुद्राको स्वरूपका बारेमा जानकारी गराएका थिए । विसं २००२ सालबाट प्रचलनमा आएका नेपाली रूपैयाँदेखि हालसम्म प्रचलनमा रहेका नेपाली तथा विदेशी रूपैयाँलाई विद्यालयमा नै देख्न पाउँदा विद्यार्थी र साथमा आएका अभिभावक उत्साहित बनेका थिए ।
प्रदर्शनीमा पुराना नेपाली तथा विदेशी नोट नयाँ पुस्तालाई देखाउन र त्यस्ता पुराना पैसाको संरक्षण गर्नपर्छ भन्ने उद्देश्यले आयोजना गरिएको उक्त प्रदर्शनी अवलोकन गर्न पाएकामा अभिभावकले खुसी व्यक्त गर्दै कामको प्रशंसासमेत गरेका थिए । प्रचलनमा रहेको नोट देखे पनि नेपालका पुराना र विदेशी नोट नदेखेका विद्यार्थीको लागि सो प्रदर्शनीले नोटका बारेमा ज्ञान दिएको नवपुर चिल्ड्रेन होमका प्रिन्सिपल ईश्वर केसीले बताए ।
विद्यार्थीलाई नेपाली र विदेशी नोटका बारेमा जानकारी गराउने, नोटको हिफाजत गर्न र संकलन गर्न प्रेरित गर्दै, इतिहासका बारेमा जानकारी दिने, कला–संस्कृति चिनाउने उद्देश्यसहित उक्त प्रदर्शनी गरिएको अभियन्ता सरोजले बताए । संग्रह गरेका महत्वपूर्ण मुद्रा अन्य विद्यायलयमा पनि प्रदर्शन गर्ने योजना रहेको उनले जानकारी दिए ।
नेपाली र विदेशी मुद्रा प्रदर्शनीबाट संकलन भएको रकम आर्थिक अवस्था र शैक्षिक गुणस्तर कमजोर भएका सरकारी विद्यालय तथा सामाजिक कार्यमा खर्च गर्नेे अभियन्ताद्वयले जानकारी दिए । –रासस
काठमाडौं मुस्ताङको जोमसोम–लोमान्थाङ सडक झन्डै चार महिनापछि सञ्चालनमा आएको छ । जोमसोमदेखि कागबेनी छुसाङ हँुदै उपल्लो मुस्ताङको लोघेकर दामोदरकुण्ड र लोमान्थाङ गाउँपालिका जोड्ने सडकमा गत पुसदेखि हिउँ जमेर यातायात सेवा अवरुद्ध भएको थियो ।
सडक सुचारु भएपछि चिसो छल्न बेँसी झरेका उपल्लो मुस्ताङका बासिन्दा घर फर्कन थालेका छन् । सो सडक खुलेपछि लोमान्थाङ, दामोदरकुण्ड, कोरला क्षेत्रको भ्रमणमा जाने पर्यटकलाई सहज भएको छ । बाक्लो हिउँ जमेको समर–भेना खण्डमा एक्साभेटर परिचालन गरेर हिउँ पन्छाएर खुलाइएको लोघेकर दामोदरकुण्ड गाउँपालिकाका अध्यक्ष राजु विष्टले जानकारी दिए ।
यसवर्ष फागुनको अन्तिम सातासम्म बाक्लो हिमपात भएको थियो । लोमान्थाङ, लोघेयकर दामोदरकुण्ड गाउँपालिका र उपल्लो मुस्ताङ जीप व्यवसायी समितिको पहलमा सडक खुलाइएको यातायात व्यवसायी देव गुरुङले बताए । उनका अनुसार उपल्लो मुस्ताङमा ३० भन्दा बढी गाडीले यातायात सेवा दिइरहेका छन् ।
सडक खुलेसँगै केही दिनयता म्याग्दीको बेनी हुँदै सडक मार्ग भएर मुस्ताङ भ्रमणमा जाने पर्यटक र तीर्थयात्रीको चाप बढेको छ । देशका विभिन्न ठाउँ र विदेशबाट आएका पर्यटक तथा तीर्थयात्रीको बेनी–जोमसोम सडकमा चाप बढेको जिल्ला ट्राफिक प्रहरी कार्यालय म्याग्दीका प्रमुख बैकुण्ठ पौडेलले बताए । -रासस
प्रकाशित मिति: शनिबार, चैत ३०, २०७५ ००:३५
