काठमाडौँ । पछिल्लो समय देशभर रहेका दुरसञ्चार सेवा प्रदायक कम्पनी एनसेलका टावर अज्ञात समूहको निसानामा परेको छ । बुधबार मात्र बर्दिया मधुवन नगरपालिका – ३ मा रहेको एनसेल टावरमा आगलागी भएको प्रहरीले जनाएको छ ।
आगलागीबाट तार जलेर नष्ट भएकोतर मेशिन भने सुरक्षित रहेकाे जनाइएको छ । आगलागीबारे अनुसन्धान भैरहेको प्रहरीले जनाएको छ ।
त्यतिमात्र होइन सोमबार देखि सुरू भएको यो हमला जारी छ । हालसम्म डेढ दर्जनबढी एनसेलका टावरमा अागजनी भएको छ । हमला अज्ञात समूहले गरेको प्रहरी कार्यालयहरूले जानकारी दिएको बताइएको छ। उक्त आक्रमण नेत्र विक्रम चन्दले नेतृत्व गरेको पार्टी नेपाल कम्युनिस्ट पार्टीले गराएको प्रहरीको आशंका छ।
सोमबार राति र मंगलबार दिउँसै गरिएका आक्रमणबाट कतिपय टावर पूर्ण रुपमा ध्वस्त भएको प्रहरीले जानकारी दिएको छ।
मंगलबार भएका आक्रमण राजधानीमै भएका छन्। काठमाडौंका ३ टावर त पूर्णतः ध्वस्त भएका प्रहरीले जानकारी दिएको छ। काठमाडौंको जोरपाटी, दक्षिणकाली र जहरसिंह पौवामा रहेका ३ टावर ध्वस्त भएका छन् । त्यस्तै, सुनसरीको इटहरी उपमहानगरपालीका ११ खनारमा रहेको एनसेल टावरमा आगजनी तथा तोडफोड गरिएको थियो। धनकुटा नगरपालिका वडा नम्बर १० थुम्कीडाँडामा रहेको एनसेल टावर ध्वस्त पारिएको छ। रौतहटको चन्द्रपुर नगरपालिका ८ मा रहेको टावरमा पनि क्षति पुर्याइएको छ। सोलुखुम्बुको दुधकुण्ड नगरपालिका लिङ्ला पत्ताले डाँडामा रहेको एनसेलको टावरमा ताडफोड र आगजनी भएको छ।
कञ्चनपुरको बेदकोट र शुक्लाफाँटामा रहेका एनसेलका टावर ध्वस्त पारिएको छ। डडेल्धुराको काफलीमा रहेको क्षेत्रिय टावर पनि ध्वस्त पारिएको छ। कैलालीको टिकापुर र जानकीनगरमा रहेका टावरमा आक्रमणबाट क्षति पुर्याइएको छ। सुर्खेतका ३ वटा टावरमा पूर्ण रुपमा क्षति पुर्याइएको छ। त्यस्तै, जाजरकोटका २ वटा टावरमा आक्रमण भएको छ भने रोल्पाको माडी गाउँपालिका ६ को मेनै डाँडामा रहेको टावरमाथि आक्रमण गरिएको छ।
यता मकवानपुरको मनहरीमा पनि एउटा एनसेल टावर ध्वस्त बनाइएको छ। यसरी आक्रम गरेर मुलुकभरका १७ एनसेल टावर ध्वस्त गरिएको प्रहरीले जानकारी दिएको छ।
प्रकाशित मिति: मंगलबार, फागुन १, २०७४
-1732776560.jpg)
