काठमार्डौ । सर्वोच्च अदालतको परमादेशपछि नेपाल विद्युत प्राधिकरण (नेवि प्रा) को कार्यकारी निर्देशक पदमा फेरबदल भएको छ। अदालतले पूर्व कार्यकारी निर्देशक हितेन्द्रदेव शाक्यलाई पुनर्बहाल गर्न आदेश जारी गरेसँगै ऊर्जा, जलस्रोत तथा सिंचाइमन्त्री कुलमान घिसिङका सिफारिसमा नियुक्त मनोज सिलवाल बिदामा बसेका छन्।
न्यायाधीश नहकुल सुवेदी र श्रीकान्त पौडेलको संयुक्त इजलासले सोमबार शाक्यको पक्षमा परमादेश जारी गर्दै सरकारलाई उनलाई तत्कालै पूर्व पदमा पुनर्बहाल गराउन निर्देशन दिएको थियो।
गत असोज ५ गते मन्त्री घिसिङले शाक्यलाई कार्यकारी निर्देशकबाट हटाई मन्त्रिपरिषद्को निर्णयअनुसार जल तथा ऊर्जा आयोगमा विशिष्ट श्रेणीको विशेषज्ञमा सरुवा गरेका थिए। सो निर्णय ‘कानुन विपरीत’ भएको दाबी गर्दै शाक्यले सर्वोच्चमा रिट दायर गरेका थिए।
अदालतको आदेश सार्वजनिक भएपछि मनोज सिलवाल मंगलबारदेखि बिदामा बसेको प्राधिकरण स्रोतले पुष्टि गरेको छ।
यसैबीच, पुनर्बहाल भएका शाक्यले बुधबार नेवि प्रा केन्द्रीय कार्यालयमा कार्यभार सम्हाल्ने तयारी गरेका छन्। प्राधिकरणमा उनी फर्किन लागेका बेला स्वागतका लागि विशेष व्यवस्था मिलाइएका छन्।
लामो सुनुवाइ र कानुनी बहसपछि सर्वोच्च अदालतले मन्त्रीस्तरीय सरुवा निर्णय बदर गर्दै शाक्यलाई फिर्ता पठाउने निर्णय गरेको हो।
प्रकाशित मिति: मंगलबार, मंसिर २४, २०८२
