२६ वैशाख, काठमाडौं । नेपाल विद्युत प्राधिकरणका प्रबन्ध निर्देशक पत्रकार सम्मेलन गरेर रोएका छन । मंगलबार एलईडी बल्ब खरिद प्रक्रियामा अनियमिताको आरोप लागेपछि आफ्ना धारणा राख्न पत्रकार सम्मेलन गरेका घिसिङले आफ्नो कुरा राख्दै गहभरी आँसु बनाए । इमान्दार भएर काम गरेको दाबी गर्दै उनले एउटा बल्बमा पैसा खानुपर्ने आफ्नो अवस्था नरहेको बताए । उनले भने ‘नेपाली जनताबाट एक रुपैयाँ खाने अवस्था छैन, पैसा खानु नै छ भने २–४ घण्टा लोडसेडिङ गर्दा नै करोडौं कमाएर बस्थेँ ।’ उनले भने, ‘यदि कुनै कुनियत देखियो भने हामीलाई झुण्ड्याइदिए हुन्छ । अन्यथा यस्ता गलत प्रचार नगरिदिनु होला ।’ समाचार मार्फत चरित्र हत्या गर्ने प्रयास भएको भन्दै उनले दुःख लागेको बताए । भारत सरकारसँग सहमति गरेर १३५–१४० रुपैयाँमा बल्ब ल्याउन लागेको भन्दै घिसिङले यदि कसैले सक्छ भने १५० रुपैयाँमा ल्याउन चुनौती दिए । कुनै व्यापारीले १५० रुपैयाँमै गुणस्तरीय बल्ब ल्याएमा विद्युत प्राधिकरणका २ सय वटै ग्राहक सेवा केन्द्रबाट वितरणको व्यवस्था मिलाउने घिसिङले बताए ।
प्रकाशित मिति: सोमबार, वैशाख २५, २०७४
