काठमाडौं : कथाकार एल. बी. क्षेत्रीको नयाँ कथासंग्रह ‘व्रतभङ्ग’ सार्वजनिक भएको छ ।
शनिबार राजधानीमा एक कार्यक्रमबीच उक्त पुस्तक सार्वजनिक गरिएको हो । कार्यक्रममा अर्चना थापा, महेश पौड्याल, कुमारी लामा, लेखक एल. बी क्षेत्रीलगायतले पुस्तकको संयुक्त विमोचन गरेका थिए ।
पुस्तकमाथि बोल्दै कुमारी लामाले महिला सशक्तीकरणका पक्षबाट लेखिएका कथा छोटा भए पनि अब्बल रहेको बताइन् । त्यसैगरी अर्चना थापाले महिला–पुरुष सम्बन्धका विविध आयामबारे कथा बुनिएको बताइन् । उनले कुनै कथामा भने हिंसा निराकरणको सहारा हिंसा लिएकामा भने असहमति जनाइन् ।
व्रतभङ्गबारे कवि एवं समालोचक महेश पौड्यालले एल. बी.का कथाहरूमा यौन मनोवैज्ञानिक पक्ष मात्र नभईकन सूक्ष्म मनोवैज्ञानिक जीवनबोधी पाटो पनि रहेको र यो नै बढी शक्तिशाली रहेको बताए । लेखक एल. बी. क्षेत्रीले पुस्तक लेखनका अनुभव सुनाएका थिए ।
बीएन पुस्तक संसार प्रालिले प्रकाशन गरेको उक्त पुस्तकको बजार मूल्य २०० रुपैयाँ रहेको छ ।
प्रकाशित मिति: आइतबार, वैशाख २२, २०७६ २३:४८
