गायक नवीन के भट्टराईले रक ब्याण्ड मुकुटसँग सहकार्य गरेर गाएको ‘तोडेर गयौ’ गीत सार्वजनिक गरेका छन् । नकुल कार्की र रोशन कुँवरको शब्द रहेको उक्त गीतको संगीतमा पनि नकुललाई मुकुट ब्याण्डकै रोशन कुँवरले सघाएका छन् । मुकुट ब्याण्डको संगीत पृथक साथै राम्रो हुने भएकाले उनीहरूसँग सांगीतिक सहकार्य गरेको नवीन बताउँछन् ।
आफ्नो अन्य गीतभन्दा केही फरक भएकाले दर्शक तथा श्रोताहरूले मनपराउने आशा नवीनको छ। मुकुट ब्याण्डले भने नवीन के भट्टराईसँग सांगीतिक सहकार्य गर्न पाउनु आफ्नो लागि अवसर तथा चुनौती दुवै भएको बताएको छ ।
गीतले रक र पप गीतका श्रोता तथा दर्शकलाई सँगै राख्ने आशा पनि मुकुट ब्याण्डको रहेको छ। नेपाली संगीतमा आफ्नो दुई दशकको यात्रा भए पनि यो गीतले कम ब्याक गर्न खोजेको मुकुट ब्याण्डको भनाइ छ । ब्याण्डमा गिरिश सुवेदी, रोशन कुँवर, मनीष शाक्य, शरद देउला आबद्ध छन्।
विभूषण दाहालको निर्देशन रहेको उक्त म्युजिक भिडियोको छायांकन तथा सम्पादन विपीन रिजालले गरेका छन् । गीत स्टुडियो नेपाल नामक युट्युबबाट सार्वजनिक गरिएको छ ।
हेर्नुहाेस् भिडियाे :
प्रकाशित मिति: मंगलबार, वैशाख १०, २०७६ २१:४३
