काठमाडाैं : नूरगंगा प्रतिभा पुरस्कार २०७४ को घोषणा गरिएको छ । शुक्रबार सम्पन्न नूरगंगा प्रतिभा पुरस्कार गुठीको बैठकले उक्त पुरस्कारको घोषणा गरेको हो ।
गुठीले नूरगंगा स्थापित बाल साहित्य लेखन प्रतिभा पुरस्कार पाल्पाका विनयकुमार कसजूलाई प्रदान गर्ने निर्णय गरेको छ । गुठीले एक लाख रुपैयाँ राशिको उक्त पुरस्कार कसजूलाई प्रदान गर्न लागेको हो ।
त्यस्तै नूरगंगा लुिम्बनी अञ्चल स्तरीय स्थापित क्षेत्रीय लोकगायन प्रतिभा पुरस्कार तेजबहादुर केसीलाई प्रदान गरिने भएको छ । गुठीले ३० हजार राशिको उक्त पुरस्कार नवलपरासीका केसीलाई प्रदान गर्ने निर्णय गरेको हो ।
त्यसैगरी १५ हजार राशिका नूरगंगा क्षेत्रीय साहित्य नवप्रतिभा पुरस्कार र लोक गायन नवप्रतिभा पुरस्कार क्रमशः रुपन्देहीका अस्मित रेग्मी र बागलुङकी निरु श्रीसलाई वितरण गरिने भएको छ ।
त्यस्त नूरगंगा शैक्षिक पुरस्कार पाल्पा जिल्लाका सामुदायिक विद्यालयबाट २०७५ सालको प्रवेशिका ग्रेडिङ प्रणालीमा भएकाले हाललाई स्थगित गर्दै अर्को निर्णयपछि प्रदान गरिने गुठीका सदस्य सचिव यज्ञप्रसाद शर्माले जानकारी दिएका छन् ।
त्यसैगरी गुठीले हरेक वर्ष वरिष्ठ साहित्यकारलाई प्रदान गर्दै आएको सम्मान संस्कृतिविद् सत्यमोहन जोशीलाई प्रदान गर्ने भएको छ । घोषित पुरस्कार यही वैशाख १८ गते संकृतिविद् सत्यमोहन जोशीको हातबाट प्रदान गरिने गुठीका सचिव शर्माले जानकारी दिएका छन् ।
प्रकाशित मिति: शनिबार, वैशाख ७, २०७६ १८:१८
