काठमाडौं : खालिङ सिस्टर्स मुभिज प्रालिको ब्यानरमा निर्माण हुने चलचित्र ‘द डार्क एन्ड लाइट’ को आज शुक्रबार शुभमुहूर्त गरिएको छ ।
पशुपति क्षेत्रस्थित वृद्धाश्रममा आयोजित समारोहमा चलचित्रको क्यामरा पूजा गर्दै शुभमुहूर्त गरिएको हो । त्यसक्रममा चलचित्रका निर्देशक राजु अर्याल, अभिनेता पिटर खालिङ, अभिनेत्री सरस्वती लामा तथा निर्देशक राजु अर्यालले क्यामराको पूजा गरेका थिए भने वरिष्ठ गीतकार राजेन्द्र थापाले नरिवल फुटाएर मुहूर्त भएको घोषणा गरेका थिए ।
चलचित्रमा राजु अर्याल मुख्य निर्देशकको रूपमा रहने छन् भने पिटर खालिङ, सरस्वती लामा तथा केशवराज भट्टले पनि निर्देशनमा सहयोग गर्ने छन् । वृद्धाश्रममा आश्रित वृद्ध–वृद्धालाई खाना खुवाउने उद्देश्यले गरिएको शुभमुहूर्त समारोहमा चलचित्रकी अभिनेत्री तथा निर्देशक सरस्वती लामा तथा गायक डेबिड शंकरले चलचित्रको प्रोमोसनल गीत गाएका थिए । उक्त गीतमा राजेन्द्र थापाको शब्द तथा दीपक शर्माको संगीत निर्देशन छ ।
समारोहमा गीतकार थापाले चलचित्रलाई शुभकामना दिँदै आफूले चलचित्रका लागि जनजिब्रोमा झुण्डिने शैलीको गीत तयार पारेको बताए । चलचित्रका मुख्य निर्देशक राजु अर्यालले चलचित्रको विषयवस्तुका बारेमा प्रकाश पार्दै हरेक व्यक्तिमा हुने नकारात्मक तथा सकारात्मक पक्षलाई उजागर गर्न लागिएको बताए ।
चलचित्रका प्रस्तुतकर्ता, निर्देशक तथा अभिनेता पिटर खालिङले यो चलचित्र कमेडी, रोमान्स तथा द्वन्द्व प्रधान हुने धारणा व्यक्त गरे । गायिकाको रूपमा स्थापित भइसकेकी सरस्वती लामाले यही चलचित्रमार्फत् पाश्र्व गायनका साथै अभिनय र निर्देशनको क्षेत्रमा समेत सक्रिय हुन लागेको बताइन् ।
चलचित्रमा पिटर खालिङ र सरस्वती लामासहित सेसुका राई, सुमन मगर, प्रिन्सा राई आदि कलाकारले मुख्य भूमिका निर्वाह गर्दै छन् । आज शुक्रबारदेखि नै प्mलोरमा गएको यो चलचित्रमा कुमार महर्जनको द्वन्द्व निर्देशन रहने छ भने सविन भट्टराईले यो चलचित्र छायांकन गर्ने छन् । चलचित्रका अन्य गीतमा प्रताप दास तथा मेलिना राईको समेत पाश्र्व गायन रहने बताइएको छ ।
एक महिनाको सेड्युलमा छायांकन सम्पन्न गर्ने लक्ष्य लिएको यो चलचित्र दसैंअघि नै दर्शकमाझ आउने जानकारी गराइएको छ । चलचित्रको कथा, पटकथा तथा संवाद अभिनेता पिटर खालिङले तयार पारेका हुन् ।
प्रकाशित मिति: शुक्रबार, चैत २२, २०७५ १७:५८