भोजपुर : दुर्गम पहाडी जिल्ला भोजपुरको दक्षिणी गाउँपालिका आमचोकको केन्द्र बालंखामा पूर्वाञ्चलव्यापी छैठौं भोजपुर आइडल गायन प्रतियोगिता हुने भएको छ ।
नौ प्रतिस्पर्धी रहने प्रतियोगितामा राष्ट्रियस्तरका शम्भु राई, कला राई, दीपक बान्तवालगायत कलाकारको पनि सहभागिता रहने छ । कटुञ्जे युवा क्लब धोद्लेखानीको आयोजना तथा भोजपुरका स्थानीय तहको सहयोगमा आगामी २२ गते सञ्चालन हुने प्रतियोगिताको तयारी पूरा भएको क्लबका अध्यक्ष बाजेन्द्र राईले बताए ।
अवसरको अभावमा साँघुरो भूगोलमा बस्न बाध्य भएका नवोदित कलाकारलाई प्रोत्साहन गर्नका लागि भोजपुर जस्तो दुर्गम जिल्लामा पनि क्लबले निरन्तर आइडल सञ्चालन गरिरहेको अध्यक्ष राईको भनाइ छ । आमचोक गाउँपालिकाको बालंखामा हुने प्रतियोगितामा पारस राई, मन्दिप राई, राजकेशर तामाङ, प्रिस्किला राई, कुन्ता राई, दिवाहाङ राई, बविना राई, सुजन राई र उत्तम मगर गरी नौ जना प्रतिस्पर्धामा छन् ।
प्रतियोगिता अन्तर्गत प्रथम हुनेले नगद एक लाख रुपैयाँ पाउने छ भने प्रतियोगितामा उत्कृष्ट भोकलिस्ट, उत्कृष्ट प्रस्तुति, अनुशासित कलाकारहरूले पनि पुरस्कार पाउने आयोजक संस्था कटुञ्जे युवा क्लबले जनाएको छ । आमचोक गाउँपालिकाको मुख्य प्रायोजनमा हुने प्रतियोगिताको प्रमुख अतिथि संघीय सांसद् सूदन किराँती रहने छन् ।
प्रकाशित मिति: मंगलबार, चैत १९, २०७५ ११:३४
