काठमाडौं : कवि तथा समालोचक महेश पौड्यालको कवितासंग्रह शून्य प्रहरको साक्षी सार्वजनिक भएको छ ।
काठमाडौंको प्रदर्शनीमार्गस्थित नेपाल पुलिस क्लबमा चलिरहेको पुस्तक प्रदर्शनीमा एक कार्यक्रमका बीच कवितासंग्रह सार्वजनिक गरिएको हो । कवि श्यामलको प्रमुख आतिथ्यतामा सम्पन्न कार्यक्रममा कवि मोमिला, डा. नवराज लम्साल र एलबी क्षेत्रीले संग्रहका बारेमा टिप्पणी गरेका थिए ।
कवि मोमिलाले पौड्यालका छोटा कविताहरूलाई वेदको ऋचासँग तुलना गरिन् । उनले भनिन्, धेरै मान्छेहरूले कविता लेख्छन्, प्राध्यापक छन्, समालोचना गर्छन् र कविता लेख्छन् पनि । तर मैले के लेखेँ भनेर जान्दैनन् कति कविहरू । महेश पौड्यालले कविता यस्तो हुनुपर्छ मात्र नभनेर सिर्जनाको रूपमा कविता यस्तो हुनुपर्छ भनेर कविता प्रस्तुत गर्नुभएको मलाई महसुस भएको छ ।
डा. नवराज लम्सालले पौड्यालका कविताहरूमा नारा नभएर संवेदना देख्ने धारणा राखे । उनले यसअघि आख्यानमा रमाइरहेका पौड्याललाई आफ्नो कविता लेखनलाई निरन्तरता दिनसमेत सल्लाह दिए ।
लेखक तथा समीक्षक एलबी क्षेत्रीले भने कविता अनावश्यक तन्काउन नहुने र पौड्यालले पनि आफ्ना छोटा कवितामा विषयवस्तु सकिएपछि अनावश्यक नतन्काएको बताए । उनले भने, यी दाना कविता हुन्, यी बिउ कविता हुन् । एक दिन खाल्डो खनिनेछ, त्यही खाल्डोमा यी राखिनेछन् । माटो मलजल गरिनेछ । जब ऊ मेरो उमेरमा पुग्छ, ठूलाठूला कविता र ग्रन्थहरू महेशले लेख्नेछ ।
कवि महेश पौड्यालले आफूले कम अक्षर राखेर कविता लेख्दा कस्तो हुन्छ भनेर प्रयोग गरेको र आफ्नो कृतिले पाठकको माया पायो भने आफ्नो काव्यिक प्रयोग सफल हुने बताए ।
त्रिविको केन्द्रीय अंग्रेजी विभागमा उपप्राध्यापकका रूपमा अंग्रेजी साहित्यको अध्यापन गर्दै आएका महेश पौड्यालको शून्य प्रहरको साक्षी पहिलो कवितासंग्रह हो । शिखा बुक्सले बजारमा ल्याएको संग्रहमा पौड्यालले विभिन्न समयमा लेखेका १०८ वटा छोटा कविताहरू समेटिएका छन् ।
यसअघि उनका तादी किनारको गीत उपन्यास, त्यसपछि फुलेन गोदावरी कथासंग्रहका साथै दर्जनौँ बालसाहित्य र अनुवादित पुस्तकहरू प्रकाशित छन् ।
कार्यक्रमको संयोजन कवि तथा समालोचक महेश कार्की क्षितिज ले गरेका थिए ।
प्रकाशित मिति: आइतबार, चैत १७, २०७५ २२:४४