काठमाडाैं : युवाकवि तथा गजलकार नारायण निरासीको छन्दोबद्ध कविताहरूको सङ्ग्रह ‘फूलमाथि तुसारो’ नेपाल शनिबार राजधानी काठमाडौंमा लोकार्पण गरियो ।
अनाममण्डलीको आयोजनामा भएको कार्यक्रममा समालोचक प्रभाती किरणले स्वागत मन्तव्य राखेका थिए भने पुष्कल किरण, दीपक शर्मा, जय गौडेल, बलराम दाहाल तथा भुवनहरि सिग्देलले विमोचित कृतिबाट कविता वाचन गरेका थिए ।
डा. नवराज लम्सालले कविताले विचार उत्पन्न गर्न सक्नुपर्ने, विचार उत्पादन गर्न नसक्ने कविता बलियो नहुने बताए । कृतिमाथि कवि केशव सिलवाल तथा कवि प्रह्लाद पोखरेलले समीक्षात्मक टिप्पणी प्रस्तुत गरेका थिए ।
कार्यक्रमका प्रमुख अतिथि प्राध्यापक राजेन्द्र सुवेदीले निरासीका कविता कलात्मक तथा विचारोत्पादक रहेको धारणा राख्दै स्रष्टा सधैँ भोको हुनुपर्ने र जब स्रष्टा अघाउँछ, तब उसको सिर्जना सुस्ताउने धारणा राखे ।
प्रकाशित मिति: आइतबार, चैत १७, २०७५ २०:२४
