काठमाडौं : गायक तथा संगीतकार आभास यस पटकको पलेँटी कार्यक्रममा प्रस्तुत हुने भएका छन् । चैत १५, १६ र १७ गतेसम्म चल्ने यस पटकको पलेँटी मा आभासले आफ्नो सांगीतिक जीवनका अनुभवका साथै डेढ दर्जन गीत सुनाउनेछन् ।
नेपालयले संचालन गर्दै आएको लघु सांगीतिक पलेँटी को सुरुवात पनि आभासकै गीतहरूबाट भएको थियो ।
केही समयको विश्रामपछि फ्रेब्रुअरीबाट पलेँटीलाई ‘थिम’मा आधारित हुने गरी पुनः सुरु गरिएको आभासले बताए । गत महिनाको पलेँटीमा नेपाली संगीतमा महिला गायनको चर्चा भएको थियो । यसपालिको विषय आभासको संगीतिक यात्रामा केन्द्रित हुनेछ । यस पटकको पलेँटीका ’न्यारेटर’ पनि आभास नै रहनेछन् । उनले यो महिनाको आफ्नो पलेँटीलाई ’मैले हिँडेको सांगीतिक गोरेटो’ शीर्षक दिएका छन् ।
कविका रूपमा समेत परिचय बनाएका आभास संगीतका तीनवटै विधा लेखन, गायन र संगीतमा क्रियाशील छन् ।
कार्यक्रमका लागि आभासले विगतका सांगीतिक अभियान ’संकल्प’ र ’आस्था’कालदेखि अहिलेसम्मका गीतलाई छनोटमा राखेका छन् । कार्यक्रममा उनले गीतसँगै वि.सं. २०३६ र त्यसयताको उनको सांगीतिक यात्रा साथै त्यसयताका राजनीतिक तथा सामाजिक परिवर्तन र तिनमा रहेका विविध पक्षमा केन्द्रित आफ्नो संस्मरण पनि सुनाउने बताइएको छ ।
प्रकाशित मिति: शुक्रबार, चैत १५, २०७५ १६:१५