काठमाडौं : पछिल्लो समयम एकाएक चर्को घाम लाग्ने र तातो हावा (लू) चलेपछि तराईका अधिकांश जिल्लाको जनजीवन कष्टकर बन्दै गएको छ ।
तराईका महोत्तरी, धनुषा, सर्लाही, सिरहालगायत जिल्लामा दिउँसो अत्यधिक चर्को घाम लाग्ने र लू चल्ने भएका कारण सर्वसाधारण प्रभावित भएका हुन् ।
चर्को घाम र तातो हावासँगै गर्मी बढेपछि सरकारी तथा गैरसरकारी कार्यालयमा सेवाग्राहीको उपस्थिति पातलिएको गौशालास्थित सिटिजन बैंकका शाखा प्रबन्धक दिलीपकुमार श्रेष्ठले बताए । उनका अनुसार अन्य महिनाको तुलनामा यो महिना बैंकमा वित्तीय कारोबारका लागि आउने सेवाग्राहीको संख्या ह्वात्तै घटेको बताइएको छ ।
त्यस्तै तातो हावाहुरी तथा लूकै कारण आँप तथा अन्य तरकारी खेती प्रभावित भएको गौशालाका किसान लक्ष्मेश्वर महतोले बताए । बढ्दो गर्मीका कारण खेतमा काम गर्न कामदारले जान नमानेर समेत फलफूल तथा तरकारी खेती प्रभावित हुन पुगेको उनले जानकारी दिए ।
तापक्रम उच्च भएपछि बालबालिका बिरामी हुन थालेको प्राथमिक स्वास्थ्य केन्द्रका चिकित्सक मनोजकुमार साहले बताए । वैशाखयता तराईमा पानी नपर्दा गर्मीका कारण घाउखटिरा, आउँ, टाइफाइड ज्वरो, झाडापखाला लगायत सरुवा रोगका बिरामीको चाप पनि वृद्धि भएको उनले जानकारी दिए ।
प्रकाशित मिति: बिहीबार, जेठ १६, २०७६ १२:२३
